काठमाडौं। नेकपा (एमाले) को केन्द्रीय सचिवालयको बैठक बस्दैछ।आजको बैठकमा नेताहरुको कार्यविभाजनलाई अन्तिम रुप दिनेलगायत कार्यसूचीमा छलफल हुनेछ।
यसअघिको बैठकमा अध्यक्ष केपी शर्मा ओलीले प्रस्ताव गरेको नेताहरुको कार्यविभाजनलाई आज अन्तिम रुप दिने तयारी छ ।
एमाले केन्द्रीय कार्यालय सचिव डा.भीष्म अधिकारीका अनुसार बैठक बिहान साढे ११ बजे अध्यक्ष केपी शर्मा ओलीको निवास भक्तपुरको गुण्डुमा बैठक बस्न लागेको हो ।
अध्यक्ष ओलीको प्रस्तावमा नेताहरुको जिम्मेवारी हेरफेर गर्ने प्रस्ताव आएमा त्यसमा छलफल गरेर अन्तिम रुप दिइने र त्यसलाई अन्तरपार्टी निर्देशन (अपानि) मार्फत नेताहरुलाई पठाउने तयारी छ ।
गत मङ्सिर २७ देखि २९ सम्म भएको ११औं महाधिवेशनपछि नेताहरुको अस्थायी कार्यविभाजन गरिएको थियो ।
यसपटकको कार्यविभाजनमा एमालेमा मुख्य मानिएका विभागमध्ये सचिव भानुभक्त ढकाललाई सङ्गठन, केन्द्रीय सदस्य शेरबहादुर तामाङलाई स्कुल, विशाल भट्टराईलाई जनसङ्गठन र डा.सूर्य पाठकलाई प्रचार तथा प्रकाशनको जिम्मेवारी प्रस्ताव गरिएको छ ।
उपाध्यक्ष तथा उपमहासचिवलाई विभागका समन्वय गर्ने र अनुगमनको जिम्मेवारी प्रस्ताव गरिएको छ ।
