काठमाडौँ । पर्वतको जलजला गाउँपालिकाले स्थानीय जातका गाई र हलगोरु पाल्ने कृषकहरूलाई अनुदान वितरण गरेको छ ।
चालु आर्थिक वर्षको बजेटको स्थानीय गाई र गोरु संरक्षण कार्यक्रममा छनौट भएका कुषकलाई बधवारबाट अनुदान वितरण गरिरहेको गाउँपालिकाका अध्यक्ष राजुप्रसाद आचार्यले जानकारी दिए ।
यसका लागि पालिकाले १३ लाख रुपैयाँ बजेट विनियोजन गरेको थियो । ३६५ वटा स्थानीय जातका गाई र ५४ हलगोरु पालेका कृषक अनुदानका लागि छनोट भएको गाउँपालिकाका पशु विकास अधिकृत सन्देश गौडेलले जानकारी दिए ।
प्रतिगाई २ हजार र प्रतिहल गोरु ८ हजार रुपैयाँका दरले अनुदान वितरण गरिएको छ । गाउँपालिकाले सार्वजनिक सूचना जारी गरेर तोकिएको मापदण्ड पूरा गरेका कृषकहरूलाई छनोट गरेर रकम वितरण गरिरहेको जनाएको छ ।
स्थानीय जातको गाई संरक्षण, गोरू पाल्ने कृषकलाई प्रोत्साहन गर्दै खेतीपातीलाई बढवा दिन तथा जग्गा बाँझो रहन नदिनको लागि यो कार्यक्रम प्रभावकारी बनेको जलजला गाउँपालिकाका अध्यक्ष आचार्य बताउँछन् ।
व्यावसायिक किसानलाई गाउँपालिकाले नै ‘मिनी टिलर’ बाँडेको भए पनि पहाडी क्षेत्रका भिराला र बाटोको सुविधा नभएका ठाउँमा ‘मिनी टिलर’ लैजान नसक्दा पाखा, छेउछाउ र भिर नजिकका जग्गा बाँझो रहन नदिन हलगोरु पाल्ने कृषकलाई प्रोत्साहन गरिएको उनको भनाइ छ ।
आगामी आवको बजेटमा पैंयू गाउँपालिकाले पनि हलगोरु पाल्ने कृषकलाई अनुदान दिनका लागि बजेट विनियोजन गरेको छ । मिनिटेलर प्रयोग गर्ने जनशक्तिको अभाव हुँदै गएपछि गाउँपालिकाहरूले परम्परागत गोरू पाल्ने प्रचलनलाई नै बढाबा दिन थालेका हुन् ।
