काठमाडौँ । मुगुको उत्तरी भेगमा पर्ने सोरु गाउँपालिकाले आगामी आर्थिक वर्ष २०८२÷०८३  का लागि ५७ करोड रुपैयाँ बढीको बजेट ल्याएको छ । 

सोरु गाउँपालिकाको १६औं गाउँसभामा उपाध्यक्ष केशरबहादुर शाहीले ५७ करोड ९४ लाख ४७ हजार ५८२ रुपैया बरावरको बजेट प्रस्तुत गरेका हुन् । 

अघिल्लो वर्षको तुलनामा योपटक पालिकाले झण्डै ४ करोड बजेट बढी प्रस्ताव गरेको छ । बजेटमध्ये पूँजीगत तर्फ २२ करोड २५ लाख ४२ हजार छ भने चालुतर्फ ३५ करोड ६९ लाख ५ हजार ५८२ रुपैयाँ रहेको उपाध्यक्ष केशर बहादुर शाहीले जानकारी दिए । 

बजेटमा बिशेष गरेर सञ्चार क्षेत्र बाट टाढा रहेका महिला स्वास्थ्य स्वयम् सेविका लाई सञ्चारको पहुँचमा ल्याउन सुचना आदान प्रदान गर्न स्वयम्सेविका महिलालाई मोवाइल सेट र मासिक १०० रुपैयाँको रिचार्ज कार्ड प्रदान गरिने उनले बताए । 

त्यस्तै जीवन निर्वाह भत्ता कार्यक्रम अन्तर्गत सोरु गाउँपालिकाका ४० वर्ष देखि ५९ वर्ष उमेर समुहका पुरुषलाई एकल पुरुष भत्ता प्रदान गरिने बजेटमा प्रस्तुत गरिएको छ । 

शिक्षा, स्वास्थ्य, पूर्वाधार निर्माण रैथाने बाली प्रवर्धन, सूचना प्रविधि, लैगिंक हिंसा न्यूनिकरण जस्ता कार्यक्रमलाई बजेटमा विशेष प्राथमिकता दिइएको उपाध्यक्षको भनाई छ ।  सभामा अध्यक्ष धर्मबहादुर शाहीले नीति तथा कार्यक्रम प्रस्तुत गरेका छन् । 

नीति तथा कार्यक्रममा ११ वटै वडातहका बस्तीस्तरमा सडक निर्माण ५५ वटा बस्तीका स्थानीयलाई शुद्ध खानेपानी ग्रामिण विद्युतीकरण, विद्यालय भवन निर्माण, सबै वडातह बाटै स्थानीयको सेवाप्रवाह हुने गरी पूर्वाधार निर्माणको व्यवस्था उल्लेख गरिएको अध्यक्ष शाहीको भनाइ छ ।