काठमाडौं । स्वास्थ्य तथा जनसंख्या मन्त्रालयले प्रमुख जनस्वास्थ्य प्रशासक र स्वास्थ्य बिमा बोर्डका कार्यकारी निर्देशकलाई स्पष्टीकरण सोधेको छ ।
मन्त्रालयले स्वास्थ्य बिमा बोर्डको सदस्य नियुक्तिका विषयमा प्रमुख जनस्वास्थ्य प्रशासक डा. भीमप्रसाद सापकोटा र स्वास्थ्य बिमा बोर्डका कार्यकारी निर्देशक डा. कृष्णप्रसाद पौडेललाई स्पष्टीकरण सोधेको हो ।
मन्त्रालयले स्पष्टीकरण तीन दिनभित्र बुझाउन समयसीमा दिएको छ । बिमा बोर्डको सदस्य नियुक्ति र बैठकमा उपस्थितिबारे वास्तविकता के हो स्पष्टीकरण दिन भनेको छ ।
“हालै स्वास्थ्य बिमा बोर्डको सदस्यको नियुक्ति तथा सदस्यको बैठकमा उपस्थितिलगायत विषयमा सार्वजनिक सञ्चारमाध्यममा आएका माइन्युटका विषयहरू, निर्णय र उपस्थितिसँग सम्बन्धित कागजात मिलाउने काममा कर्मचारीहरूकै भूमिका रहेको भनी उल्लेख भएको सम्बन्धमा तपाईंको संलग्नता र भूमिका रहे/नरहेको, के कति कारणले यस्तो भएको हो,” प्रमुख जनस्वास्थ्य प्रशासक सापकोटालाई सोधेको स्पष्टीकरणमा मन्त्रालयले भनेको छ, “सत्य तथ्य स्पष्ट खुलाई तीन दिनभित्र जवाफ मन्त्रालयमा पेस गर्नू ।”
मन्त्रालयले बोर्डका कार्यकारी निर्देशक पौडेललाई पनि आफ्नो भूमिका रहे अथवा नरहेको र माइन्युटको विषयका बारेमा प्रस्ट पार्न भनेको छ ।
“स्वास्थ्य बीमा बोर्डको सदस्यको नियुक्ति तथा सदस्यको बैठकमा उपस्थितिलगायत विषयमा सार्वजनिक सञ्चार माध्यममा आएका माइन्युटका विषय, निर्णय र उपस्थितिसँग सम्बन्धित कागजात मिलाउने काममा कर्मचारीहरूकै भूमिका रहेको भनी उल्लेख भएको सम्बन्धमा तपाईंको संलग्नता र भूमिका रहे/नरहेको, र के कति कारणले यस्तो भएको हो,” मन्त्रालयले सोधेको स्वष्टीकरणमा भनिएको छ, “सत्य तथ्य स्पष्ट खुलाई तीन दिनभित्र जवाफ मन्त्रालयमा पेस गर्नू ।”
निस्क्रिय भइसकेको बोर्ड सदस्य जुनु श्रेष्ठलाई पुनः बैठकमा सहभागी गराएको भन्दै विवाद भएपछि मन्त्रालयले सरोकारवालापक्षलाई स्पष्टीकरण सोधेको हो ।
यही विषयलाई लिएर श्रेष्ठका श्रीमान् तत्कालीन श्रममन्त्री दीपक साहलाई सरकारले पदमुक्त गरिसकेको छ ।
