प्रधानमन्त्री केपी शर्मा ओलीले भारतको उत्तराखण्डमा हालै आएको भीषण बाढीका कारण भएको जनधनको क्षतिप्रति दुःख व्यक्त गरेका छन् ।
प्रधानमन्त्री ओलीले सामाजिक सञ्जालमार्फत एक सन्देश दिँदै बाढीले ठूलो क्षति पुर्याएको खबरले आफू चिन्तित भएको उल्लेख गरेका छन् । उनले भनेका छन्, ‘छिमेकी मित्रराष्ट्र भारतको उत्तराखण्डमा बाढीले ठूलो जनधनको क्षति पुगेको दुःखद खबरले चिन्तित छु।’
बाढीमा १७ भन्दा बढी नेपाली नागरिक पनि परेको खबर प्राप्त भएको उनले बताएका छन् । प्रधानमन्त्री ओलीले उनीहरूको उद्दारका लागि भारतस्थित नेपाली दूतावासमार्फत तत्काल कुटनीतिक छलफल सुरु गरिएको जानकारी दिएका छन् ।
बाढी र पहिरोका कारण ज्यान गुमाउनेहरूप्रति श्रद्धाञ्जली अर्पण गर्दै प्रधानमन्त्री ओलीले पीडामा रहेका परिवारजनमा धैर्यधारण गर्ने शक्ति मिलोस् भन्ने कामनासमेत गरेका छन् ।
सरकारले भारतसँग समन्वय गर्दै नेपाली नागरिकको उद्दार र सुरक्षा प्राथमिकतामा राखेर काम गरिरहेको प्रधानमन्त्रीको भनाइ छ ।
