इलाम। इलामका दुई पालिकाले भोटेकोशी बाढीपिडितका लागि ३५ लाख सहयोग गर्ने घोषणा गरेका छन्।
रसुवागढी हुँदै आएको बाढीबाट प्रभावितहरूको उद्धार, उपचार तथा राहतका लागि चुलाचुली गाउँपालिकाले २५ लाख र माई नगरपालिकाले १० लाख रूपैयाँ प्रधानमन्त्री दैवीप्रकोप उद्धार कोषमा जम्मा गर्ने निर्णय गरेका हुन् ।
चुलाचुली गाउँपालिकाको ७६औं कार्यपालिका बैठकले गाउँपालिका अध्यक्ष र उपाध्यक्षद्वारा सात दिनको र वडाध्यक्ष तथा सदस्यद्वारा पाँच दिनको सेवासुविधा प्रधानमन्त्री दैवीप्रकोप उद्घार कोषमा जम्मा गर्ने निर्णय गरेको हो ।
गाउँपालिका अध्यक्ष राजेन्द्र केरुङले गाउँपालिकाका विभिन्न तहका कर्मचारीको पारिश्रमिक उपलब्ध गराउने निर्णय भएको जानकारी दिए ।
यसैगरी बिहीबार नै बसेको माई नगरपालिकाको ६५औं कार्यपालिका बैठकले सबै जनप्रतिनिधिका तर्फबाट १५ दिनको सेवासुविधा र कर्मचारीको तर्फबाट दुई दिनको पारिश्रमिक प्रधानमन्त्री दैवीप्रकोप उद्घार कोषमा जम्मा गर्ने निर्णय गरेको छ ।
जनप्रतिनिधि र कर्मचारीबाट संकलित रकममा नगरपालिकाको विपद् व्यवस्थापन कोषबाट रकम थप गरी १० लाख रूपैयाँ उपलब्ध गराउने निर्णय भएको हो।
