काठमाडौं । लगातारको वर्षासँगै सिन्धुलीको खुर्कोटस्थित सुनकोशी नदीमा पानीको बहाव उच्च बनेको छ ।
आइतबार बिहान ७ः२० बजेको मापनअनुसार जलसतहले सतर्कताको सीमा पार गरेकाले नदी तटीय क्षेत्रमा उच्च सतर्कता अपनाउन जल तथा मौसम विज्ञान विभाग अन्तर्गतको बाढी पूर्वानुमान महाशाखाले आग्रह गरेको छ ।
महाशाखाले विशेष बुलेटिन जारी गर्दै नदी तटीय क्षेत्रमा बसोबास गर्ने बासिन्दाहरूलाई उच्च सतर्कता अपनाउन आग्रह गरेको छ ।
महाशाखाको पछिल्लो तथ्यांकअनुसार आज बिहान ७ः२० बजे खुर्कोट जलमापन केन्द्रमा नदीको सतह ७.७५ मिटर पुगेको छ र यो क्रम बढिरहेको छ । खुर्कोट केन्द्रमा ७.५ मिटरलाई सतर्कता तह मानिन्छ भने ८.६ मिटरलाई खतराको तह मानिन्छ ।
सुनकोशी नदीमा जलसतहले सतर्कता तह पार गरेसँगै सिन्धुली र रामेछापका नदी तटीय क्षेत्रहरुमा डुबान र कटानको जोखिम बढेको छ । तटीय क्षेत्रमा बहाब अझै बढ्नसक्ने सम्भावना रहेकाले सुरक्षित स्थानमा रहन र आवश्यक पूर्वतयारी गर्न स्थानीयबासीलाई महाशाखाले अनुरोध गरेको छ ।
