धनुषा । धनुषाको हंशपुर नगरपालिका–५ का ३६५ परिवारले नापजाँच सम्पन्न भएको करिब ११ वर्षपछि जग्गाधनी प्रमाणपत्र (लालपुर्जा) प्राप्त गरेका छन्।
लामो समयदेखि बसोबास गर्दै आएका स्थानीय ३६५ परिवारले अब आफ्नो जग्गामाथिको कानुनी स्वामित्व औपचारिक रूपमा प्राप्त गरेका हुन्।
नापी कार्यालय धनुषाले आवश्यक प्रक्रिया पूरा गरी उनीहरूलाई जग्गाधनी प्रमाण पुर्जा वितरण गरेको हो।
उक्त क्षेत्रको नापजाँच कार्य २०७२ सालमै सम्पन्न भएको थियो। तर नापनक्सा सम्पन्न भए पनि आवश्यक कानुनी तथा प्रशासनिक प्रक्रिया पूरा हुन नसक्दा लामो समयसम्म जग्गाधनी प्रमाण पुर्जा वितरण हुन सकेको थिएन।
लामो समयदेखि रोकिएको प्रक्रिया अघि बढाउँदै अहिले ३६५ थान जग्गाधनी प्रमाण पुर्जा वितरण गरिएको हो।
जग्गाधनी प्रमाण पुर्जा प्राप्त भएसँगै उनीहरूको जग्गामाथिको स्वामित्व स्थापित भएको छ।
स्वबासी जग्गा दर्ता गरी जग्गाधनी प्रमाण पुर्जा वितरण भएपछि स्थानीय बासिन्दाले कानुनी तथा आर्थिक लाभ प्राप्त गर्न सक्नेछन्।
लालपुर्जा प्राप्त भएपछि जग्गा बैंक तथा वित्तीय संस्थामा धितो राखेर ऋण लिन सहज हुनेछ।
त्यस्तै, जग्गाको स्वामित्व स्पष्ट भएपछि भूमिसम्बन्धी विवाद निरुपण गर्नसमेत सहज हुनेछ। यसअघि धनुषाका ३६०१ परिवारलाई लालपुर्जा वितरण गरिएको थियो।
