काठमाडौँ । रसुवामा आएको बाढीका कारण उत्पन्न परिस्थितिलाई मध्यनजर गर्दै उद्धार तथा राहत कार्यलाई तीव्रता दिइएको छ। बाढी प्रभावित क्षेत्रमा नेपाली सेना, सशस्त्र प्रहरी बल (APF) र नेपाल प्रहरी परिचालन गरिएको छ भने अन्य जिल्लाहरूबाट समेत थप जनशक्ति प्रभावित क्षेत्रतर्फ पठाइएको छ।
विपद् व्यवस्थापन प्राधिकरणलाई सक्रिय बनाउँदै मेडिकल टिम, नेपाल स्काउट र रेडक्रससँग समन्वय गरी आवश्यक उद्धार कार्य अघि बढाइएको छ। प्रभावित क्षेत्रमा थप एम्बुलेन्स तथा स्वास्थ्यकर्मीहरूको टोली पठाउने प्रक्रिया सुरु भइसकेको छ।
बाढीको जोखिमलाई ध्यानमा राख्दै तल्लो तटीय क्षेत्रका बासिन्दाहरूलाई तत्काल सुरक्षित स्थानमा स्थानान्तरण गर्न सम्बन्धित प्रमुख जिल्ला अधिकारी (सीडीओ) लाई निर्देशन दिइएको छ। साथै, एसएमएस तथा फोन कलमार्फत नागरिकहरूलाई सुरक्षित स्थानमा जान पूर्वसतर्कता (अलर्ट) सन्देश पठाइएको छ।
उद्धार तथा राहत वितरणलाई प्रभावकारी बनाउन सरकारी हेलिकप्टरहरू प्रभावित क्षेत्रतर्फ पठाइनुका साथै निजी हेलिकप्टर कम्पनीहरूलाई समेत तयारी अवस्था (स्ट्यान्डबाई) मा रहन भनिएको छ। केही हेलिकप्टरहरू उद्धारका लागि प्रभावित क्षेत्रतर्फ पुगिसकेका छन्।
विपद्पछिको अवस्था समीक्षा तथा आगामी कदम चाल्नका लागि उच्चस्तरीय बैठक बोलाइएको छ।
सम्बन्धित निकायले सम्पूर्ण नागरिकलाई सुरक्षित स्थानमा रहन आग्रह गर्दै आफन्तहरूसँग सम्पर्क नभएमा उद्धार टोलीको सूचना प्रतीक्षा गर्न अनुरोध गरेको छ। थप जानकारी तथा राहतका लागि १२३४, १०० र ११११ नम्बरमा सम्पर्क गर्न सकिने व्यवस्था मिलाइएको छ।
