काठमाडौं - चालु आर्थिक वर्षको पहिलो त्रैमाससम्म आउँदा नेपाल टेलिकमको नाफा घटको छ। चालु आर्थिक वर्षको पहिलो त्रैमाससम्ममा कम्पनीले १ अर्ब ३२ करोड रुपैयाँ खुद नाफा आर्जन गरेको छ।

कम्पनीको नाफा गत आर्थिक वर्षको सोही अवधिको तुलनामा २३.८२ प्रतिशतले घटेको हो । गत आर्थिक वर्षको सोही अवधिसम्ममा कम्पनीले १ अर्ब ७३ करोड ९५ लाख रुपैयाँ खुद नाफा कमाएको थियो।

कम्पनीको आम्दानी घटेका कारण  नाफा घटेको हो । चालु आवको पहिलो तीन महिनामा कम्पनीको आम्दानी ०.०१ प्रतिशतले घटेर ८ अर्ब ६७ करोड ९५ लाख रुपैयाँमा झरेको छ । अघिल्लो आर्थिक वर्ष यस कम्पनीको आम्दानी ८ अर्ब ६८ करोड १ लाख रुपैयाँ रहेको थियो ।

यस अवधिसम्म आउँदा कम्पनीको वित्तीय आम्दानी ४८.९९ प्रतिशतले घटेर ६० करोड ५ लाख रुपैयाँमा सीमित भएको छ । गत आर्थिक वर्षमा यस कम्पनीको यस्तो आम्दानी १ अर्ब १७ करोड ७१ लाख ६६ हजार रुपैयाँ रहेको थियो।

त्यस्तै, कम्पनीको कुल आम्दानी समीक्षा अवधिमा ५.८९ प्रतिशत घटेर ९ अर्ब ४७ करोड रुपैयाँमा सीमित भएको छ । गत आवमा यस कम्पनीको यस्तो नाफा १० अर्ब ६ करोड ३७ लाख रुपैयाँ थियो ।