काठमाडौं । विश्वकप फुटबल–२०२६ अन्तर्गत जापानले नेदरल्याण्ड्ससँग २–२ गोलको बराबरी खेलेको छ ।
डलास स्टेडियममा भएको खेलमा नेदरल्याण्ड्सले दुई पटक अग्रता लिएर पनि जापानविरुद्ध जित निकाल्न सकेन । पहिलो हाफ गोलरहित बराबरीमा सकिएको खेलमा दोस्रो हाफमा चार गोल भएको हो ।
खेलको ५०औं मिनेटमा भान डाइकले हेडरमार्फत गोल गर्दै डच टोलीलाई अग्रता दिलाएका थिए । त्यसको सात मिनेट पछि नै जापानका लागि केइतो नाकामुराले बराबरी गोल फर्काए ।
त्यसको सात मिनेटमा नेदरल्यान्ड्सले फेरि अग्रता बनायो । खेलको ६४औं मिनेटमा क्रिसेन्सो समरभिलले गोल गरेका हुन् ।
तर खेलको ८९औं मिनेटमा डाइची कामाडाले गोल गर्दै खेललाई फेरि बराबरीमा ल्याए । योसँगै नेदरल्याण्ड्स पहिलो खेलमा जापानविरुद्ध ३ अंक जोड्न असफल भयो भने जापानले महत्वपूर्ण १ अंक खोस्यो ।
यो समूहमा जापानसँगै नेदरल्याण्ड्स, स्वीडेन र ट्युनिसिया रहेका छन् ।
