काठमाडौं । फिफा विश्वकप–२०२६ अन्तर्गत आफ्नो पहिलो खेलमा युरोपेली देश पोर्चुगल अफ्रिकी राष्ट्र डिआर कंगोसँग १–१ गोलको बराबरीमा रोकिएको छ ।
गएराति अमेरिकाको ह्युस्टन स्टेडियममा भएको समुह के अन्तर्गतको खेलमा पोर्चुगलले सुरुवातमै अग्रता लिएपनि जोगाउन नसक्दा बराबरीमा चित्त बुझाउन बाध्य भयो ।
पोर्चुगलका जोआओ नेभेसले पेड्रो नेटोको पासमा छैटौं मिनेटमै गोल गर्दै पोर्चुगललाई अग्रता दिलाएका थिए ।
तर ५२ वर्षपछि विश्वकपमा पुनरागमन गरेको डिआर कंगोले पहिलो हाफको अन्तिम समयमा बराबरी गोल फर्कायो । कंगोका योहान विसाले पहिलो हाफको इन्जुरी समयको चौथो मिनेटमा बराबरी गोल गरेका थिए ।
फिफा विश्वकप इतिहासमा कंगोको यो पहिलो गोल र पहिलो अंक समेत हो ।
यसअघि सन् १९७४ मा जायरको नामबाट विश्वकप खेल्दा समूह चरणका तीनवटै खेलमा पराजित भएको थियो भने एक गोल पनि गर्न सकेको थिएन ।
यो समूहमा पोर्चुगल र डीआर कंगोसँगै कोलम्बिया र उज्बेकिस्तान रहेका छन् ।
