काठमाडौँ । प्रधानमन्त्री पुष्पकमल दाहाल ‘प्रचण्ड’ले प्रधानमन्त्रीका हैसियतमा प्रतिनिधिसभाका ६३ सांसदको मात्र विश्वासको मत पाएका छन् । प्रतिनिधिसभा बैठकमा २५८ सांसद उपस्थित थिए ।
प्रतिनिधिसभामा प्रधानमन्त्री प्रचण्डले राखेकाे विश्वासकाे मतसम्बन्धी प्रस्तावमाथि छलफल भएपछि गरिएकाे मतविभाजनमा प्रधानमन्त्रीलाई विश्वासको मत दिन्छु भन्ने प्रस्तावकाे पक्षमा ६३ मात्र सांसदको मत परेको छ ।
उनलाई विश्वासको मत दिन्न भन्ने प्रस्तावकाे विपक्षमा १९४ सांसदको मत परेको छ । योसँगै प्रधानमन्त्री प्रचण्डको १९ महिने सरकार यात्रामा पूर्णविराम लागेको छ ।
प्रचण्डलाई पाँचौँपटक (अ)विश्वासको मत, यस्तो छ संसदीय अंकगणित
विपक्षमा कांग्रेस, एमाले, राप्रपा, जसपा, जसपा नेपाल, जनमत, नागरिक उन्मुक्ति, लोसपालगायतका दलले मत दिएका छन् ।
प्रचण्डले संसदको विश्वास गुमाएसँगै अब राष्ट्रपतिले नयाँ प्रधानमन्त्री चयनका लागि दुई वा दुईभन्दा वढी दलको बहुमतप्राप्त दलको नेतालाई आह्वान गर्नेछन् ।
कांग्रेस र एमालेसहितका दलहरुबीच भावी प्रधानमन्त्रीमा एमाले अध्यक्ष केपी ओलीलाई अघि सार्ने सहमति भइसकेको छ ।
दलहरुबीच दुई तिहाइ सांसदको हस्ताक्षरसहित ओलीलाई प्रधानमन्त्रीमा प्रस्ताव गर्दै राष्ट्रपतिसमक्ष बुझाउने पत्र तयार भइसकेको छ ।
संसदले प्रधानमन्त्रीले विश्वासको मत नपाएको जानकारी राष्ट्रपतिलाई गराएपछि राष्ट्रपतिबाट नयाँ सरकार गठनको प्रक्रिया सुरु हुनेछ ।
