न्युयोर्क । संयुक्त राष्ट्रसंघका महासचिव एन्टोनियो गुटेरेसले आफ्नो कार्यकाल सकिएपछि पनि नेपाललाई सहयोग जारी राख्ने प्रतिबद्धता जनाएका छन् ।
संयुक्त राष्ट्रसंघको मुख्यालयमा प्रधानमन्त्री वालेन्द्र शाहसँगको भेटमा उनले सो प्रतिबद्धता जनाएका हुन् ।
प्रधानमन्त्री शाहले महासभालाई सम्बोधन गर्नुअघि राष्ट्रसंघको मुख्यालयमा नेपाली समयअनुसार शुक्रबार बिहान ४ः१५ बजे महासचिव गुटेरेससँग भेट भएको हो ।
भेटमा प्रधानमन्त्री शाहले नेपालप्रतिको सद्भावका लागि महासचिव गुटेरेसलाई धन्यवाद दिँदै उनको सफल कार्यकालका लागि बधाई दिएको प्रधानमन्त्रीको सचिवालयले जनाएको छ ।
रसुवास्थित भोटेकोशी नदीमा आएको बाढीबाट नेपालले ठूलो क्षति बेहोरेको उल्लेख गर्दै प्रधानमन्त्री शाहले अझै पनि हिमताल फुट्ने जोखिम अझै उच्च रहेको बताएका छन् ।
महासचिव गुटेरेसले भोटेकोशी बाढीमा भएको जनधनको क्षतिप्रति गहिरो समवेदना व्यक्त गर्दै जलवायु मुद्दामा संयुक्त राष्ट्रसंघ नेपालसँग साथमै रहेको विश्वास दिलाए ।
आफू सन् १९७८ मा पर्यटकका रूपमा नेपाल गएको स्मरण गर्दै महासचिव गुटेरेसले पदबाट निवृत्त भएपछि पनि नेपाललाई सहयोग गरिरहने प्रतिबद्धता व्यक्त गरे ।
