काठमाडाैं। अर्थमन्त्री डा.स्वर्णिम वाग्ले टर्कीमा भइरहेको संयुक्त राष्ट्रसंघीय जलवायु परिवर्तनसम्बन्धी महासन्धिका पक्ष राष्ट्रहरूको ३१औं सम्मेलन (कोप–३१) मा सहभागी भएर स्वदेश फर्किएका छन् । उनले त्यहाँ रहँदा करिब एक दर्जन कार्यक्रमहरुमा सहभागिता जनाएको उनकाे सचिवालयले जनाएकाे छ ।
उनले ४४ वटा अतिकम विकसित राष्ट्रका तर्फबाट जलवायु वित्त सम्बन्धी सातौं द्विवार्षिक मन्त्रीस्तरीय संवादलाई सम्बोधन गरे ।
यसैगरी सात वर्षअघि स्थापित 'जलवायु मुद्दाका लागि अर्थमन्त्रीहरुको गठबन्धन' मा नेपाललाई १०५ औं (नयाँ) सदस्यका रुपमा सामेल गराउँदै 'उत्थानशीलताका लागि वित्त' बारे नीतिगत अवधारणा छलफलका लागि पेश गरे ।
विपद्पछि ऋणमोचनको विश्वव्यापी अभियान चलाएकी बार्बेडसकी प्रधानमन्त्री मिया मोट्ली र विश्व अर्थतन्त्रको ८५ प्रतिशत हिस्सा ओगट्ने जी–२० समूहको अध्यक्षता गर्न लागेको बेलायतका विदेशमन्त्री एड मिलीब्यान्डसँग विशेष अन्तर्राष्ट्रिय प्याकेजमा सहकार्य गर्ने प्रतिबद्धता प्राप्त भएको छ।
त्यस्तै कोप–३१ मा नेपालले उठाएका विषयमा सहयोग लिने हेतुले अर्थमन्त्री डा.स्वर्णिम वाग्लेसँग पाँचजना प्रभावशाली जलवायु दूतहरुले समेत छलफल गरे ।
जसमा बेलायतकी रेचेल काइट, अष्ट्रेलियाका विल नानकर्भिस, स्वीडेनका माटियास फ्रुमेरी, जमाइकाका डेल वेबर र राष्ट्र संघीय महासचिवका दुत सेल्विन हार्ट छन्।
हरित जलवायु कोषको उच्च नेतृत्वसँग भावी कार्यक्रमका बारेमा अर्थमन्त्रीले छलफल गरेका छन् छन् भने जेनेभास्थित विश्व मौसम-विज्ञान संगठनको नेपालले समेत लाभ लिएको जलवायु मापन कोष सम्बन्धी कार्यक्रमलाई विशेष सम्वोधन गरेका छन्।
जलवायु र अर्थशास्त्रमा ख्याति कमाएका प्रा.योहान रक्स्त्रम र प्रा. निकलस स्टर्नसँग समेत अर्थमन्त्रीले भेटघाट गरे ।



