काठमाडौं - कात्तिक महिनाका लागि वाणिज्य बैंकहरूले नयाँ ब्याजदर कायम गरेका छन् । केही दिन अघी सार्वजनिक भएको नयाँ व्याजदर अनुसार असोज महिनाको तुलनामा कात्तिकमा बैंकहरूको अधिकतम औसत ब्याजदर घटेको छ ।

कार्तिक महिनाका लागि व्यक्तिगत मुद्दति निक्षेपमा ब्याजदर ०.२६ व्याजदर घटेको छ। व्यक्तिगत मुद्दति निक्षेपमा बैंकहरूको अधिकतम औसत ब्याजदर ५.४६ प्रतिशतविन्दु रहेकोमा, कात्तिकमा यो घटेर ५.२० प्रतिशतविन्दुमा पुराएका छन् ।

हाल सञ्चालनमा रहेका २० वाणिज्य बैंकहरूमध्ये १४ बैंकहरूले ब्याजदर घटाएका छन् भने बाँकी ६ बैंकहरूले असोज महिनाकै दरलाई निरन्तरता दिएका छन्। यस कारण औसत ब्याजदरमा समग्र रूपमा गिरावट आएको हो। त्यस्तै, बैंकहरूले संस्थागत मुद्दति निक्षेपको अधिकतम औसत ब्याजदर पनि ०.२२ प्रतिशतविन्दुले घटाएका छन्।

कात्तिक महिनामा सबैभन्दा बढी ब्याजदर घटाउने बैंकमा माछापुच्छ्रे बैंक र एनएमबि बैंक रहेका छन्। यी दुई बैंकले व्यक्तिगत तथा संस्थागत दुबै मुद्दति निक्षेपमा ब्याजदर १ प्रतिशतविन्दुले घटाएका हुन्। नेपाल बैंक, सिद्धार्थ बैंक, राष्ट्रिय वाणिज्य बैंक, कुमारी बैंक, ग्लोबल आइएमई बैंक र हिमालयन बैंकले भने असोज महिनाकै ब्याजदरलाई निरन्तरता दिएका छन्।