काठमाडौं । नेपालबाट बंगलादेशले थप २० मेगावाट बिजुली लैजाने निर्णय गरिएको छ । बिहीबार (मंसिर ११) बसेको नेपाल–बंगलादेश ऊर्जा सचिवस्तरीय संयुक्त निर्देशक समिति (जेएससी)को सातौँ बैठकबाट यस्तो निर्णय गरिएको हो ।
बंगलादेशले हाल नेपालबाट ४० मेगावाट विद्युत् लगिरहेको छ । थप २० मेगावाट विद्युत् आवश्यक प्रक्रिया पूरा गरी लैजाने निर्णय गरिएको हो ।
यस्तै, सुनकोसी–३ जलविद्युत् आयोजनामा लगानी अघि बढाउन बंगलादेशले मूल्यांकनका निम्ति विशेषज्ञ समिति गठन गरी जेभीए छिटो टुंग्याउने निर्णय गरिएको छ ।
नेपालबाट भारतीय ग्रीड हुँदै बरापुकारया, पञ्चगढ/ठाकुरगाउँ, भेरामारा र कोमिल्लासम्म विद्युत् निर्यात सम्भावना अध्ययन गर्ने निर्णय पनि बैठकबाट गरिएको छ ।
दुई देशले नवीकरणीय ऊर्जा तथा ऊर्जा दक्षता प्रवद्र्धनसम्बन्धी समझदारीपत्रमा आ–आफ्नो आन्तरिक प्रक्रिया पूरा गरी हस्ताक्षर गर्ने र उक्त सम्झौताअन्तर्गत बंगलादेशले नेपाललाई ऊर्जा परीक्षण, ईभी चार्जिङ, रुफटप सोलारलगायत क्षेत्रमा प्राविधिक सहयोग प्रदान गर्ने सहमति गरेका छन् ।
दुवै देशबीच क्षमता अभिवृद्धि कार्यक्रम सञ्चालन गर्न प्रथम चरणमा बंगलादेशी पक्षका निम्ति काठमाडौंमा र त्यसपछि नेपाली पक्षका लागि बंगलादेशमा तालिम सञ्चालन तथा नेपाल–भारत–बंगलादेश त्रिदेशीय ऊर्जा सहकार्यसम्बन्धी समझदारीपत्र (एमओयू)मा भारतको सहमति लिन संयुक्त प्रयास गर्ने निर्णय समेत गरिएको छ ।
बंगलादेशको ढाकामा सम्पन्न बैठकमा नेपालका तर्फबाट ऊर्जा, जलस्रोत तथा सिँचाइ मन्त्रालयका सचिव चिरञ्जीवी चटौत र बंगलादेश सरकारका तर्फबाट विद्युत्, ऊर्जा तथा खनिज मन्त्रालयकी सचिव फर्जाना ममताजको उपस्थिति थियो ।
यसअघि, यही मंसिर १० गते संयुक्त कार्यदल (जेडब्ल्यूजी)को बैठक बसेको थियो । यसले अघि सारेका सिफारिसमा सचिवस्तरीय बैठकमा विस्तृत छलफल गरिएको ऊर्जा मन्त्रालयका प्रवक्ता सन्दीपकुमार देवले जानकारी दिए ।
