काठमाडौँ । काठमाडौँ जिल्लाको कागेश्वरी मनोहरा नगरपालिकाले नापी तथा मालपोत सेवा प्रवाह सुरु गरेको छ । 

सो नगरपालिकाले असार १ गते (हिजो) देखि सेवा सुरु गरेको हो । सेवा सञ्चालनको पहिलो दिन नगरपालिकाले लालपुर्जा वितरण गर्दै सेवा हस्तान्तरणको औपचारिक सुरुवात गरेको हो ।

भूमि व्यवस्था, सहकारी, संघीय मामिला तथा सामान्य प्रशासन मन्त्रालयले स्थानीय तहबाटै नापी तथा मालपोत सेवा उपलब्ध गराउने योजनाअन्तरर्गत कागेश्वरी मनोहरा नगरपालिकाले सेवा सुरु गरेको हो।

सेवा प्रवाहको पहिलो दिन २ वटा लालपुर्जा वितरण गरिएको नगरपालिकाका प्रमुख प्रशासकीय अधिकृत पुरुषोत्तम सुवेदीले जानकारी दिए । आजदेखि भने मालपोत र नापीका सबै सेवा उपलब्ध गराइएको उनको भनाइ छ ।

‘हाम्रो नगरपालिकाको भवन ठूलो छ । भुइतलाबाट नापी र मालपोत सेवा सुरु गरेका छौं । यसमा नयाँ पुराना गरी २० जना जति कर्मचारी सहभागी भएका छन् । पहिलादेखि नै रहेको नापी शाखालाई पूर्ण रुपमा सोही प्रयोजनमा प्रयोग गरिएको छ,’ प्रमुख प्रशासकीय अधिकृत सुवेदीले वडापालिकासँग भने ।

उनले पूर्वाधार निर्माण गर्न करिब २० लाख रुपैयाँ लगानी भएको र केही कर्मचारी करारमा लिइएको जानकारी दिए ।

मन्त्रालयले देशभरका इच्छुक पालिकाहरूमा चरणबद्ध रूपमा नापी तथा मालपोत सेवा हस्तान्तरण मन्त्रालयको योजना अनुसार कागेश्वरी मनोहरा नगरपालिकाबाट सेवा सन्चालनमा आएको हो । यसअघि मन्त्रालयको आह्वानमा २०७ वटा स्थानीय तहले नापी तथा मालपोत सेवा सञ्चालन गर्न इच्छुक रहेको जानकारी गराएका थिए ।

स्थानीय तहबाटै सेवा उपलब्ध हुन थालेपछि नागरिकले जग्गा प्रशासनसम्बन्धी सेवाका लागि मालपोत तथा नापी कार्यालयसम्म पुग्नुपर्ने बाध्यता कम हुने अपेक्षा गरिएको छ । यसबाट समय, खर्च र झन्झट घट्ने तथा सेवाप्रवाह थप प्रभावकारी बन्ने विश्वास गरिएको छ ।

मन्त्रालयले आवश्यक प्राविधिक पूर्वाधार, जनशक्ति व्यवस्थापन तथा तालिमको व्यवस्था गर्दै अन्य स्थानीय तहहरूमा समेत सेवा विस्तार गर्ने तयारी गरिरहेको जनाएको छ।