महेन्द्रनगर । कञ्चनपुरको लालझाडी गाउँपालिका–४ का विजयकुमार चौधरी वैदेशिक रोजगारीका शिससिलामा सात वर्षअघि मजदुरी गर्न मलेसिया पुगे । तर विदेशको बसाई उनले सोचेजस्तो थिएन ।
मलेसियामा तीन वर्ष मजदुरी गरेका चौधरीको मासिक तलब ३५ हजार रुपैयाँ थियो । विदेशको चर्को गर्मीमा कठोर श्रम बेचेर स्वदेश फर्किएका विजयले त्यसपछि भने आफ्नै देशमा व्यवसाय गर्ने सोच बनाए ।
विदेशमा आम्दानी गरेको केही रकम र अन्य रकम थपथाप गरेर उनले माछापालन सुरु गरे । उनी अहिले वार्षिक ४५ क्विन्टलसम्म माछा बेचिरहेका छन् ।
चौधरी गत जेठ १५ गते कृषि, वन तथा पर्यावरण मन्त्रालयलबाट छनौंट भई राष्ट्रपति रामचन्द्र पौडेलबाट राष्ट्रिय उत्कृष्ट कृषक पुरस्कारबाट पुरस्कृत समेत भएका छन् ।
पुरस्कृत भएपछि उनमा कृषिप्रतिको लगाब झनै बढेको छ । कृषि, वन तथा पर्यावरण मन्त्रालयलले सात प्रदेशबाट उत्कृष्ट दुई/दुई जना कृषक गरी १४ कृषकलाई सम्मानित गरेको थियो ।
सम्मानसँगै दुई लाख रुपैयाँ राशिको पुरस्कार पाएपछि हर्षित भएका चौधरीले सम्मानले कृषि पेसाप्रति जाँगर बढेको बताए ।
‘राष्ट्रपतिबाट सम्मान पाउँदा हौसला थपिएको छ,’ चौधरीले भने, ‘अब युवालाई पनि कृषि र उत्पादनमुखी काममा लगाउने योजना व्यवसाय सञ्चालन गर्ने योजनामा छु ।’
सात वर्षदेखि सिकलपट्टी जाइमा तीन बिघामा माछा पोखरी बनाएर मत्स्य उत्पादनमा लागेका चौधरीले निकट भविष्यमा थप पाँच बिघा जमिन भाडामा लिएर माछा उत्पादन बढाउने गरी अघि बढिसकेको बताए ।
‘वार्षिक ४५ क्विन्टल माछा बिक्री गरिरहेको छु,’ चौधरीले भने, ‘वर्षमा नौ लाखभन्दा बढी बचत हुन्छ ।’ स्वदेशी माछा उत्पादनको बजारीकरणका लागि सरकारले वातावरण मिलाई दिनुपर्ने चौधरीको भनाइ छ ।
‘यहाँ उत्पादन भएको माछा झलारी, बेलौरी, वाणी र स्थानीय बजारमा खपत भइरहेको हुन्छ,’ उनले भने, ‘भारतलगायत अन्य मुलुकबाट आयात हुने माछालाई रोक लगाएर स्वदेशी उत्पादनलाई बजारको सुनिश्चतता गरिनुपर्छ ।’
चौधरीले हरेक वर्ष असोजदेखि माघ महिनासम्म माछा बिक्री वितरण हुने गरेको बताए । उनको कामले अन्यले पनि रोजगारी पाउनु सुखद कुरा हो । ‘माटोमा पसिना बगाए युवा विदेश जानु पर्दैन । यही राम्रै मुनाफा कमाउन गर्न सकिन्छ ।’
