चितवन । रसुवामा आएको भीषण बाढीपछि बेपत्ता भएका नागरिकहरूको शव नारायणी नदीका तटीय क्षेत्रहरूमा भेटिने क्रम जारी छ। चितवन, नवलपरासी (बर्दघाट सुस्ता पूर्व) र नवलपरासी (बर्दघाट सुस्ता पश्चिम) भएर बग्ने नारायणी नदी र आसपासका क्षेत्रमा हालसम्म ठूलो संख्यामा शवहरू फेला परेका छन्।
सरकारले सार्वजनिक गरेको पछिल्लो विवरण अनुसार बाढीका कारण हालसम्म देशभर ९ सय ३ जनाको शव फेला परिसकेको छ। जसमध्ये तल्लो तटीय क्षेत्रका तीन जिल्लामा मात्रै ६ सय ३० वटा शव भेटिएका छन्।
बाढीको बहावसँगै बगेका कतिपय शवहरू भारतीय भू-भागसम्म समेत पुगेका छन्। बाढी प्रभावित मुख्य क्षेत्र रसुवा र नुवाकोटमा उद्धार कार्य जारी रहँदा तल्लो तटीय क्षेत्रमा पानीको बहाव घटेसँगै शवहरू देखिन थालेका हुन्।
खोजीमा नेपाली सेनाको कमान्डो टोली
नारायणी नदी तथा आसपासका क्षेत्रमा बेपत्ताहरूको खोजी तथा उद्धार कार्यका लागि नेपाली सेनाले सक्रियता बढाएको छ। मध्य पृतनाको नेतृत्वमा गठित ‘टास्क फोर्स’ अन्तर्गत सेनाका विभिन्न युनिटहरूले कार्यक्षेत्र विभाजन गरी खोजी गरिरहेका छन्।
खोजी कार्यमा नयाँ गोरख गण र नयाँ सबुज गण संयुक्त रूपमा खटिएका छन् भने जोखिमपूर्ण तथा कठिन भू-भागमा खोजी गर्न सिंहनाथ गणको कमान्डो तालिमप्राप्त विशेष टोली परिचालन गरिएको नेपाली सेनाले जनाएको छ। सोमबार बिहान ५ बजेदेखि सञ्चालन गरिएको विशेष खोजीका क्रममा दिउँसो २ बजेसम्म चितवनको नगर वन टापु क्षेत्रबाट मात्रै १० वटा शव र दुईवटा शवका अवशेष फेला परेका छन्।
चितवन क्षेत्रमा खोजी कार्यलाई प्रभावकारी बनाउन ड्रोन तथा वाटर रबर बोटसहित ४ सय ३६ जनाको संयुक्त सुरक्षाकर्मी टोली निरन्तर परिचालन गरिएको छ।
