काठमाडौँ । बाँके जिल्लाको जानकी गाउँपालिकाले भोटेकोशी नदीमा आएको बाढीबाट प्रभावित परिवारको राहत, उद्धार तथा पुनःस्थापनाका लागि जनप्रतिनिधि र कर्मचारीको सुविधा कटौती गरी आर्थिक सहयोग गर्ने निर्णय गरेको छ।
गाउँपालिकाका अध्यक्ष छब्बन खाँको अध्यक्षतामा बसेको स्थानीय विपद् व्यवस्थापन समितिको बैठकले बाढीपहिरोमा परी ज्यान गुमाएका, बेपत्ता तथा घाइते भएका र अन्य बाढीपीडितको खोज तथा उद्धार, राहत, पुनःस्थापना र पुनर्निर्माणका लागि आर्थिक सहयोग उपलब्ध गराउने निर्णय गरेको गाउँपालिकाका प्रमुख प्रशासकीय अधिकृत परशु राम उपाध्यायले जानकारी दिए
गाउँपालिकाले स्थानीय विपद् व्यवस्थापन कोषबाट १ लाख १ हजार रुपैयाँ तत्काल उपलब्ध गराउने निर्णय गरेको छ।
यस्तै, गाउँपालिका अध्यक्ष, उपाध्यक्ष, वडाध्यक्ष तथा गाउँकार्यपालिका सदस्यबाट प्राप्त हुने मासिक सुविधामध्ये ७ दिन बराबरको रकम विपद् राहतका लागि सहयोग गरिने भएको छ। वडा सदस्यहरूको मासिक सुविधाबाट भने ३ दिन बराबरको रकम कट्टा गरिनेछ।
त्यसैगरी गाउँपालिकाबाट तलबभत्ता खाने स्थायी, अस्थायी, करार तथा ज्यालादारी कर्मचारी, शिक्षक र स्वास्थ्यकर्मीलगायत राष्ट्रसेवक कर्मचारीबाट अधिकृतस्तरको ७ दिन, सहायकस्तरको ५ दिन र कार्यालय सहयोगीस्तरको ३ दिन बराबरको तलब रकम विपद् राहतका लागि उपलब्ध गराउने निर्णय गरिएको छ।
गाउँपालिकाले विपद्का कारण प्रभावित नागरिकको खोज, उद्धार, राहत तथा पुनःस्थापनामा सहयोग पुग्ने उद्देश्यले जनप्रतिनिधि र कर्मचारीको तर्फबाट समेत योगदान गर्ने निर्णय गरेको जनाएको छ।
बाढीपीडितको पीडामा स्थानीय सरकारको साथ देखाउँदै जानकी गाउँपालिकाले गरेको यो निर्णयले राहत तथा पुनःस्थापनाका काममा थप सहयोग पुग्ने अपेक्षा गरिएको छ।
