काठमाडौँ । झापा जिल्लाको गौरादह नगरपालिकाले कृषकका लागि कृषि चुन वितरण कार्यक्रम सञ्चालन गर्ने भएको छ।
नगरपालिकाको कृषि विकास शाखाले आर्थिक वर्ष २०८३/०८४ को स्वीकृत वार्षिक कार्यक्रमअन्तर्गत कृषि चुन खरिदका लागि दररेट पेश गर्न सम्बन्धित सप्लायर्स, विक्रेता तथा फर्महरूलाई आह्वान गरिएको नगरपालिकाका प्रमुख प्रशासकीय अधिकृत कृष्णप्रसाद सुवेदीले जानकारी दिए ।
यसको लागि नगरपालिकाले सार्वजनिक सुचना नै प्रकाशन गरेको उनले बताए । सूचनाअनुसार ७० प्रतिशतभन्दा बढी न्युटलाइजिङ भ्यालु भएको कृषि चुन खरिद गरिनेछ। नगरपालिकाले यसको आवश्यक परिमाण ८१ हजार ९ सय किलोग्राम तोकेको छ।
इच्छुक सप्लायर्स, विक्रेता तथा फर्महरूले ढुवानीसहितको दररेट उपलब्ध गराउनुपर्नेछ। सूचना प्रकाशित भएको मितिले ३ दिनभित्र गौरादह नगरपालिका कार्यालयमा दररेट पेश गर्न नगरपालिकाले आग्रह गरेको छ।
नगरपालिकाको कृषि चुन वितरण कार्यक्रमले कृषकलाई माटोको अम्लीयपन व्यवस्थापन गर्दै माटोको उर्वराशक्ति सुधार गर्न सहयोग पुग्ने अपेक्षा गरिएको छ।
