काठमाडौँ । काठमाडौँ महानगरपालिकाले जलनको उपचार गर्नु पर्ने लक्षित वर्गका व्यक्तिलाई २ लाख रुपैयाँ निःशुल्क उपचार गराउने भएको छ । 

अतिविपन्न, हिंसा पीडित तथा बेवारिसे बिरामीहरुलाई महानगरपालिकाको स्वास्थ्य शिक्षा समितिको सिफारिसमा सेवा प्रदान गरिनेछ । यस्तै काठमाडौँ महानगरपालिका क्षेत्रभित्र बसोबास गर्ने स्थायी बासिन्दा, कानुन बमोजिम बसाइँसराइ गरी आएका व्यक्तिहरू, महानगरका जनप्रतिनिधिहरू, कर्मचारीहरू र उनीहरूका परिवारका सदस्यहरूलाई पनि यो सेवा प्रदान गरिनेछ । काठमाडौँ महानगरले दिएको जानकारी अनुसार उपचारका लागि प्रतिव्यक्ति २ लाख रुपैयाँसम्मको खर्च कोषबाट व्यहोरिनेछ । 

कोषको रकम उपचारका लागि मात्र प्रयोग गरिनेछ । बिरामीले अस्पतालको क्याबिन सेवा, ईएचएस सेवा वा कस्मेटिक उपचार रोजेको खण्डमा भने कोषबाट रकम खर्च गरिनेछैन । अस्पतालले आफूसँग उपलब्ध सेवा र सुविधाहरूमा मात्र यो कोष परिचालन गर्नुपर्ने सम्झौतामा उल्लेख छ ।

यो सेवा प्रदान गर्न आज काठमाडौँ महानगरपालिका र कीर्तिपुर अस्पताल (जनस्वास्थ्य सरोकार ट्रष्ट) का बिचमा सम्झौता सम्पन्न भएको छ । महानगरपालिकाका कार्यवाहक मेयर सुनिता डंगोल र प्रमुख प्रशासकीय अधिकृत मुक्तिराम अर्यालको रोहवरमा महानगरपालिकाका तर्फबाट स्वास्थ्य विभागका प्रमुख दिपककुमार केसी र अस्पतालका तर्फबाट कार्यकारी निर्देशक गौरी प्रधानले सम्झौता पत्रमा हस्ताक्षर गरेका हुन् ।

उपचारका लागि प्रयोग हुने औजार, उपकरण तथा निःशुल्क उपचार सेवा सञ्चालन गर्न महानगरपालिकाले अस्पताललाई २ करोड रुपियाँ प्रदान गरेको छ । यसमध्ये ‘जलन उपचार कोष’ का लागि १ करोड रुपैयाँ हो । कोषमा जम्मा गरिएको रकम, यस आर्थिक वर्षमा खर्च हुन नसके आगामी वर्षहरूमा समेत जलन उपचारकै लागि प्रयोग हुनेछ । गएको वर्ष खरिद गरिएका साधन, औजार तथा उपकरणका लागि १ करोड रुपियाँ प्रदान गरिएको हो । यसरी खरिद गरिएका सामानहरुमा १ थान एनेस्थेसिया मेसिन, २५० केभीएको १ थान जेनेरेटर र ५ सय एम।ए। को १ थान डिजिटल एक्स रे मेसिन छन् । यी सामग्रीहरु कार्यवाहक मेयर डंगोलले अस्पताललाई हस्तान्तरण गरेकी छन् ।

सामग्री तथा चेक हस्तान्तरणपछि बोल्दै कार्यवाहक मेयर डंगोलले भनिन् ‘कसैले जलन भोग्नु नपरोस् । भवितव्य पर्‍यो भने पैसा नभएर अस्पताल नलैजाने अवस्था नआओस् । बल्ल बल्ल अस्पताल पुर्‍याएपछि विरामी छोडेर पैसाको खोज्न जानु नपरोस् । यसका लागि कोषको व्यवस्था गरेका हौँ ।’

उनले आगलागी नियन्त्रण गर्दा फ्रन्ट लाइनमा बसेर काम गर्ने अग्नि नियन्त्रक, नगर प्रहरी, स्वास्थ्यकर्मी, जनप्रतिनिधि, कर्मचारी र महानगरबासीलाई जलनबाट बच्ने उपायको क्षमता विकासका कार्यक्रम सञ्चालन गर्ने जानकारी दिइन् । जलनमा पर्नेलाई २ लाख रुपैयाँसम्मको निःशुल्क उपचार प्रदान गरिने उनले जानकारी दिइन्  ।

महानगरपालिकाले उपलब्ध गराएका ५ सय एमएको डिजिटल एक्सरे मेसिनबाट दैनिक १ सयजनासम्मलाई सेवा दिन सकिएको जानकारीबाट आफूलाई खुशी लागेको बताउँदै कार्यवाहक मेयर डंगोलले, वीर अस्पताल, राष्ट्रिय ट्रमा सेन्टर, टिचिङ् हस्पिटल, कान्ति बाल अस्पतालसहित ठुला अस्पतालहरुलाई विरामीको सहज उपचारका लागि आवश्यक पर्ने पूर्वाधार, साधन तथा उपकरण सहयोग गरिएको जानकारी दिँदै स्वास्थ्य सेवामा नागरिकको पहुँच बढाउन महानगर अस्पताल स्थापनाको तयारी गरिएको बताइन् । 

आर्थिक वर्ष २०८२/०८३ मा महानगरपालिकाले अस्पतालसँग करिब १ करोड रुपियाँ बराबरका स्वास्थ्य उपचारका लागि आवश्यक पर्ने साधन तथा उपकरण खरिद गर्न सघाएको थियो । 

आजको सम्झौता समारोहमा महानगरपालिकाका प्रमुख प्रशासकीय अधिकृत मुक्तिराम अर्यालले, अस्पतालबाट प्रवाह भएको सेवाको गुणस्तर वृद्धि गर्न र क्षमता बढाउन महानगरपालिकाले प्रदान गर्ने सहयोगलाई निरन्तरता दिने बताए । यस्तै अस्पतालका कार्यकारी अध्यक्ष डा. भरतकुमार प्रधानले महानगरपालिकाबाट प्राप्त भएको उपकरण महत्वपूर्ण रहेको बताउँदै महानगरपालिकाले प्रवाह गर्ने स्वास्थ्य सेवामा पनि अस्पतालले सघाउने बताए ।

अस्पतालका कार्यकारी निर्देशक प्रधानले, काठमाडौँ महानगरपालिकाले आर्थिक वर्ष २०८१/०८२ मा २ वटा लिफ्ट जडान गरिदिएर अस्पतालको सेवालाई गुणस्तरीय बनाउनदेखि उपचारमा आवश्यक पर्ने साधन तथा उपकरणमा गरेको सहयोगबाट धेरै विरामी र विरामीका आफन्तलाई सेवामा सहजता भएको धारणा राखे ।

सम्झौता बमोजिम क्षमता विकासका लागि उपचार सेवाका साथै जलन सम्बन्धी दुर्घटना हुन नदिने उपाय, प्राथमिक उपचार र सुरक्षा सम्बन्धी जनचेतनामूलक कार्यक्रम तथा तालिमहरू सञ्चालन हुनेछन् । 

यो सम्झौतासँगै अब जलनको गम्भीर समस्या भोगिरहेका महानगरवासीहरूले आर्थिक अभावका कारण उपचारबाट वञ्चित हुनुपर्ने अवस्थाको अन्य हुने विश्वास गरिएको छ ।