काठमाडौँ । सेयरमा लगानी गर्नु भएको छ भने तपाईंले सानिमा रिलायन्स लाइफ इन्स्योरेन्स कम्पनीले जारी गरेको सार्वजनिक सुचना थाहा पाउनु भएको होला ।
सुचनामा भनिएको छ– कम्पनीले आर्थिक वर्ष २०७९।८० को नाफाबाट सेयरधनीलाई १८.३८ प्रतिशत बोनस सेयर दिएको छ, त्यसमा लाग्ने कर तिर्नुस र बोनस सेयर लिनुस् ।
सुचनामा थप भनिएको छ– सानिमा रिलायन्स लाइफ इन्स्योरेन्स कम्पनीको डिभिडेन्ड ट्याक्स एकाउन्ट एनएमबी बैंकमा छ, त्यो एकाउन्टमा रकम जम्मा गरेपछि मात्रै तपाईको डिम्याट एकाउन्टमा सेयर आउँछ, नत्र आउँदैन ।
सामान्य रुपमा यो कुरा सुन्दा तपाईंको कन्सिरी तात्न सक्छ । किनभने नाफा गरेको कम्पनीले बोनस सेयर दिने, अनि लाभांश कर तिर्न सेयरधनी भौतारिनु पर्ने ? कम्पनीले नै कर तिरेर बाँकी रहेको लाभांश दिएको भए भैहाल्थ्यो नि ।
पाईंले यस्तो सोच्नु ठिकै हो । अहिले प्रायः सबै कम्पनीले लाभांशको लागि तिर्नुपर्ने कर तिरेर सेयरधनीलाई नगद लाभांश हो भने बैंक खातामा र बोनस सेयर हो भने डिम्याट खातामा सेयर पठाइदिन्छन् पनि ।
सानिमा रिलायन्स लाइफ इन्स्योरेन्स कम्पनीको हकमा केही समस्या भएर नै कम्पनीले सेयरधनीलाई यस्तो सुचना प्रवाह गरेको हो ।
भयो के भने २०७९ चैत ९ गते तत्कालिन सानिमा लाईफ र रिलायन्स लाईफ इन्स्योरेन्स कम्पनी मर्ज सानिमा रिलायन्स इन्स्योरेन्स कम्पनीको नामबाट एकिकृत कारोबार भयो । यसरी मर्ज भएका कमपनीले २ वर्षसम्म लाभांश कर तिर्नु नपर्ने व्यवस्था आयकर ऐनमा गरियो ।
यसो हुँदा सानिमा रिलायन्स लाइफ इन्स्योरेन्स कम्पनीका २०७९ चैत ९ गतेभन्दा अगाडीका सेयरधनीले लाभांश कर तिर्नु पर्र्दैन । त्यसपछिका सेयरधनीले भने लाभांश कर तिर्नुपर्छ ।
अर्थात सानिमा रिलायन्स लाइफ इन्स्योरेन्स कम्पनीमा लाभांश कर तिर्नुपर्ने नपर्ने गर ि२ खालका सेयरधनी छन् ।
कम्पनीले सार्वजनिक गरेको सुचना लाभांश कर तिर्नुपर्ने सेयरधनीका लागि हो । अझ सजिलोसँग भन्ने हो भने २०७९ चैत ९ गतेपछि सेयर किनेका सेयरधनीले हो ।
कम्पनीहरुले लिएको लाभांशमा ५ प्रतिशत लाभांश कर लाग्छ । यसो हुँदा २०७९ चैत ९ गतेपछि कायम सेयरधनीले सो बोनस वापत ५ प्रतिशत लाभकर भुक्तान गर्नुपर्ने गर्नुपर्छ ।
कर वापतको रकम जम्मा गरेपछि मात्रै हितग्राही खातामा बोनस सेयर जम्मा गरिदिने पनि कम्पनीले स्पष्ट पारेको छ ।
कर वापतको रकम एनएमबी बैंक रहेको सानिमा रिलयन्स डिभिडेण्ड ट्याक्स खाता नम्बर ९९०००५३६६७८००१७३ जम्मा गर्नुपर्ने जनाइएको छ । करको विवरण सानिमा रिलायन्स इन्स्योरेन्सको वेवसाइटमा गएर हेर्न सकिने पनि कम्पनीले जनाएको छ ।