काठमाडौँ । आफुलाई प्रधानमन्त्री केपी ओलीकी छोरी र संविधानसभा अध्यक्ष स्वर्गीय सुवास नेम्वाङको भान्जी दाबी गर्दै ठगीमा सक्रिय युवन्तिका राईले झुटो विवरण दिएर नागरिकता लिएको ठहर भएको छ ।
नेकपा एमाले इलाम जिल्ला कमिटी सदस्य तथा युवा संघ केन्द्रीय सदस्यसमेत रहेकी राईले एमाले अध्यक्षदेखि संविधानसभा अध्यक्ष हुँदै विभिन्न व्यवसायीसम्मलाई ठगी गर्दै आएको विषयमा वडापालिकाले निरन्तर समाचार लेख्दै आएको थियो ।
उनले झुटो विवरण दिएर नागरिकता बनाएकोसहितका बदमासीका विषयमा वडापालिकाले यसअघि राज्य संयन्त्रलाई यसरी ढाँटिरहेकी छिन् केपी ओलीकी ‘छोरी’ र सुवास नेम्वाङकी ‘भान्जी’ युवन्तिका शीर्षकमा पहिलो समाचार तयार पारेको थियो ।
चितवन जिल्ला अदालतका न्यायाधीश केदारनाथ पौडेलको इजलासले मंगलवार (आज) युवन्तिका तामाङ भनिने युवन्तिका राईले झुटो विवरण दिएर नागरिकता बनाएको ठहर गरको हो ।
सुर्योदय नगरपालिका इलाम घर भएकी युवन्तिकाले चितवनका किशोर तामाङ भन्ने व्यक्तिलाई दाजु बनाएर उनका बाबु छविलाल तामाङलाई बाबु कायम गरी लिएको नागरिकता झुटो भएको अदालतले फैसला गरेको हो ।
अदालतले उनले लिएको नागरिकता झुटो भएको ठहर गर्दै झुटो नागरिकता दिएकोमा सजाय निर्धारण गर्नका लागि अर्को पेशी तोक्न आदेश दिएको छ ।
झुटो नागरिकता लिएको अभियोगमा चितवन जिल्ला अदालतमा मुद्दा परेपछि युवन्तिका १० फागुन, २०७९ मा धरौटी बुझाएर छुटेकी थिइन् । सो मुद्दामा अन्तिम फैसला गर्दै अदालतले उनले लिएको नागरिकता झुटो भएको ठहर गरेको हो ।
सम्बन्धित समाचार
- राज्य संयन्त्रलाई यसरी ढाँटिरहेकी छिन् केपी ओलीकी ‘छोरी’ र सुवास नेम्वाङकी ‘भान्जी’ युवन्तिका
- युवन्तिकाका झुट श्रृङ्खलाः कानुनमा तामाङ, व्यवहारमा राई, यसरी ढाँटिन् सिडियो, पालिका र एमालेलाई
