काठमाडौँ । सरकारले निजामती कर्मचारी कल्याणकारी कोष नियमावली संशोधन गर्न लागेको छ । २०७२ सालमा बनेको नियमावली पहिलो पटक संशोधन गर्न लागिएको हो ।
संघीय मामिला तथा सामान्य प्रशान मन्त्रालयले दिएको जानकारी अनुसार कोषको सेवा सुविधालाई समयानुकुल परिमार्जन गर्नुपर्ने भएकोले नियमावली संशोधन गर्न लागिएको हो ।
कार्यविधि संशोधनको लागि मन्त्रालयले मस्यौदा तयार पारिसकेको छ । मस्यौदामा कोषबाट कर्मचारीले पाउने सेवा सुविधालाई थप गरिएको छ ।
नियमावलीको नियम ७ मा कोषबाट व्यहोरिने खर्च सम्बन्धी व्यवस्था छ । सो व्यवस्थामा २ बुँदा थप गर्दै सरकारले वहालवाला र पूर्वकर्मचारी तथा उनीहरुका सन्ततीले नेपालका शैक्षिक संस्थामा उत्कृष्ट नतिजा ल्याए कोषबाट विल बमोजिम वा बढीमा ५ लाख रुपैयाँसम्म प्रदान गरिने व्यवस्था छ ।
यस्तै, सरकारी सेवाको सिलसिलामा मृत्यू भएका कर्मचारीको परिवार तथा सन्ततीका निम्ति संचालक समितिले उचित ठहराए बमोजिम एक पटकलाई बढीमा ५ लाख रुपैयाँसम्म प्रदान गरिने भनिएको छ ।
