काठमाडौँ । काठमाडौं महानगरपालिकाले प्रदान गरेको एम्बुलेन्सबाट ग्रामीण स्वास्थ्य सेवामा टेवा पुगेको धारणा गाउँपालिकाका अध्यक्ष र उपाध्यक्षहरुले धारणा राखेका छन् ।

महानगरपालिकाले वितरण गरेका एम्बुलेन्स ग्रहण गर्न राष्ट्रिय सभा गृहमा आएका उनीहरुले यस्तो प्रतिक्रिया दिएका हुन् ।

सुनसरी जिल्लाको भोक्राहा नरसिंह गाउँपालिकाका अध्यक्ष अजमल अख्तर मियाँ ले काठमाडौँ महानगरबाट आफूहरुले ठूलो सहयोग पाएको बताए ।

सोलुखुम्बु जिल्लाको सोताङ्ग गाउँपालिकाका अध्यक्ष खिलराज बस्नेतले काठमाडौँ महानगरबाट प्रापत भएको यो सहयोग जनता जनताबीचको सुमधुर सम्बन्धको नमुना भएको बताए । यस्तै। वैतडी जिल्लाको सिगास गाउँपालिकाका उपाध्यक्ष धाना धामीले काठमाडौँ महानगरबाट प्राप्त एम्बुलेन्स कार्यविधि बनाएर संचालन गर्ने बताइन् ।

काठमाडौँ महानगरपालिकाले आर्थिक वर्ष २०८२/८३ को बजेट तथा कार्यक्रममा व्यवस्था गरेअनुसार देशभरका विभिन्न ३५ वटा गाउँपालिकालाई एम्बुलेन्स वितरण सुरु गरेको छ।

यसअघि आ.व. २०८०/८१ को बजेटमा समेत निरन्तरता दिइएको कार्यक्रमअन्तर्गत नगरसभाको निर्णयबाट ३५ थान ‘बी–क्लास’ एम्बुलेन्स खरिद गरी वितरण गर्ने तयारी भएको थियो। बोलपत्र प्रक्रियामार्फत श्री अग्नि इन्करपोरेटेडसँग सम्झौता भई आपूर्ति भएका एम्बुलेन्सलाई प्राविधिक निरीक्षण टोलीमार्फत परीक्षण गरि प्रतिवेदन प्राप्त भएपछि वितरण प्रक्रिया अघि बढाइएको हो।

आ.व. २०८१/८२ मा समेत ८ करोड १० लाख रुपैयाँ विनियोजन भई सोही गाउँपालिकामा एम्बुलेन्स सहयोग गरिएको र चालु आर्थिक वर्षको नीति तथा कार्यक्रममा पनि निरन्तरता दिइँदै ८ करोड १० लाख रुपैयाँ बजेट विनियोजन गरिएको थियो ।

महानगरले प्राप्त अनुरोध तथा मापदण्डका आधारमा छनोट भएका गाउँपालिकाका स्वास्थ्य चौकी, प्राथमिक स्वास्थ्य केन्द्र तथा आधारभूत अस्पताललाई एम्बुलेन्स उपलब्ध गराउने निर्णय गरेको हो।