काठमाडौं - गृहमन्त्री ओमप्रकाश अर्यालले सरकारले आगामी फागुन २१गते जुनै पनि हालतमा निर्वाचन गराएर छोड्ने दाबी गरेका छन् ।
बिहीबार राष्ट्रिय सभाअन्तर्गतको सार्वजनिक नीति तथा प्रत्यायोजन विधायन समितिको बैठकमा बोल्दै उनले निष्पक्ष, धाँधलीरहित र शान्तिपूर्ण वातावरणमा चुनाव गराउनु पर्ने दायित्व सरकारको रहेको बताउँदै त्यसैमा सरकार जुटेको बताएका हुन् ।
उनले भने, ‘अहिले चुनाव हुन्छ कि हुँदैन भन्ने आशङ्काहरू छन् । खास गरी सुरक्षाको हिसाबले बाधाहरू नआएको होइन आइराखेकै छन् । चुनावको वातावरण बन्ने तर्फ नै गएको छ । सबै दलले दल दर्ता गर्नुभएको छ ।
सरकारले जसरी पनि चुनाव गर्छ । त्यही ढङ्गले काम गर्छ । दलीय नभएर यो गैर दलीय सरकार भएकाले हामीले त्यही खालको भूमिका खेल्नुपर्छ । हाम्रो निष्पक्ष, धाँधलीरहित र शान्तिपूर्ण वातावरणमा चुनाव गराउनु पर्ने दायित्व छ ।’
त्यस्तै, उनले धेरै हतियार फिर्ता आइसकेको भन्दै फिर्ता भएका कतिपय जलेर कामै नलाग्ने अवस्थामा रहेको बताए । अहिले कति हतियार बाहिर छन् भन्ने कुरा सुरक्षा सम्बन्धी प्रोटोकलले भन्न नमिल्ने बताउँदै उनले फिर्ता नभएकोमा केही जलेको र केही ठुला हतियार खोलामा बगाएको पनि हुनसक्ने आशङ्का व्यक्त गरे ।
‘अहिले हतियार बाहिर कति छन् भन्ने कुरा हाम्रो सुरक्षा सम्बन्धी प्रोटोकलले भन्न मिल्दैन । धेरै जस्तो हतियारहरू फिर्ता भइसकेको छन् । फिर्ता नभएकोमा केही जलेको छन् र केही ठुला हतियार चाहिँ खोलामा बगाएको पनि हुनसक्छ,’ उनले भने ।
त्यस्तै, फरार कैदी मध्य गम्भीर अपराधमा संलग्नहरूको सङ्ख्या कम भएकाले हतियार र कैदी बन्दीकै कारणले चुनाव बिथोलिन्छ भन्ने पक्षमा सरकार नरहेको धारणा राखे ।
‘हत्यामा संलग्न अङ्गभङ्ग यस्तो खालको गम्भीर अपराधमा संलग्नहरूको सङ्ख्या अलि कम नै छ । लागू औषध र जबरजस्ती करणीको अलि धेरै छ । त्यसैले हतियार र कैदी बन्दीकै कारणले चुनाव बिथोलिन्छ भन्ने पक्षमा हामी छैनौँ‚’ उनले भने ।
