Odapalika - The Fourth Estate - चौथो अंग
२१ फागुनमा हुने निर्वाचनका लागि लागि १२० दल दर्ता

काठमाडौं- आगामी फागुन २१ गते हुने प्रतिनिधिसभा निर्वाचनका लागि कुल १२० राजनीतिक दल निर्वाचन आयोगमा दर्ता भएका छन् । दल दर्ताको अन्तिम दिन कुल १२० वटा दल दर्ता भएका आयोगका प्रवक्ता नारायणप्रसाद भट्टराईले लोकान्तरलाई जानकारी दिए ।

यस अघि मंसिर १० गतेसम्मका लागि दल दर्ताको म्याद तोकिएकोमा राजनीतिक दलहरूको संख्या बढ्दै जाँदा आयोगले मंसिर १४ गतेसम्म म्याद थप गरेको थियो ।

मंसिर १४ गते थपिएको म्याद भित्र कुल १२० वटा दलले दर्ता गरेका प्रवक्ता भट्टराईले बताए । यसैगरी आयोगले १६८ वटा मतदान स्थल थप्ने निर्णय गरेको छ । आज बसेको आयोग बैठकले १६८ वटा मतदान स्थल थप्ने निर्णय गरेको प्रवक्ता भट्टराईले जानकारी दिए ।

मतदान स्थल पुनरावलोकन गर्ने क्रममा मतदान स्थलको नाम, ठेगानामा रहेको त्रुटि सच्याउने, मतदातालाई पायक पर्ने स्थानमा आंशिक वा सबै मतदातालाई स्थानान्तरण गर्ने, मतदातालाई साबिककै अर्को मतदानस्थलमा समायोजन गर्नेलगायतका कार्य सम्पन्न गरिएको उनले बताए ।

प्रकाशित मिति: आइतबार, मंसिर १४, २०८२  १९:४७
प्रतिक्रिया दिनुहोस्
Weather Update