काठमाडौँ । सप्तरी जिल्लाको छिन्नमस्ता गाउँपालिकाले राजविराज–छिन्नमस्ता सडकखण्डमा सडक र पेटी अतिक्रमण गरी बनाइएका संरचना तथा राखिएका सामग्री हटाउन निर्देशन दिएको छ।
गाउँपालिकाले आज (असोज २६ गते) सार्वजनिक सुचना प्रकाशन गरी भोलि (असोज २७ गते) विहान ८ बजेसम्म सडक पेटीका अस्थायी संरचना हटाइसक्न भनेको हो ।
गाउँपालिकाका अध्यक्ष विद्यानन्द चौधरीले आज अपरान्ह ५ बजे सो सम्बन्धी सुचना आफ्नो सामाजिक संजाल फेसबुकमा सेयर गरेका छन् ।
सुचना अनुसार गाउँपालिकाले वडा नम्बर ६ को जनता माध्यमिक विद्यालय, इटहरीदेखि दक्षिणतर्फ वडा नम्बर ३ को न्योर बोडरसम्म सडक र पेटीमा गरिएको अतिक्रमण हटाउन भनिएको छ ।
गाउँपालिकाको कार्यालयले जारी गरेको सूचनाअनुसार सडक तथा पेटीमा घरटहरा, गुम्ती, पसल, गोबर, गुँडठा लगायतका सामग्री राखेर सडक अवरुद्ध गरिएको भन्दै त्यस्ता सामग्री हटाउन निर्देशन दिइएको छ।
निर्धारित समयभित्र अतिक्रमण नहटाए सडक अतिक्रमण गर्ने व्यक्ति तथा संस्थामाथि नियमानुसार कारबाही गरिने गाउँपालिकाले जनाएको छ।
गाउँपालिकाका प्रमुख प्रशासकीय अधिकृत केशवकुमार झाले दशैंकै लागि सडक खाली गर्न लागिएको बताए । छिन्नमस्ता मन्दिरमा ठूलो संख्यामा दर्शनार्थी आउने भएकोले सडक खुल्ला राख्न यस्तो पहल गरिएको उनको भनाइ छ ।
‘दशैंकको बेलामा छिन्नमस्ता देवीको मन्दिरमा ठूलो संख्यामा दर्शनार्थी आउँछन् । सडकमा घर, टहरा, घुम्ती पसल, गोबर, गुइठा लगायतका सामान राखी अवरोध सिर्जना गरिएको छ । त्यसैले दशैंको बेलामा सडक खुल्ला राख्नको लागि यस्तो सुचना प्रकाशन गरी सडक खाली गर्न लागिएको हो,’ प्रमुख प्रशासकीय अधिकृत झाले वडापालिकासँग भने ।
गाउँपालिकाले सडकपेटी खाली गर्ने सम्बन्धी सुचनाको जानकारी जिल्ला प्रशासन कार्यालय सप्तरी र सडक डिभिजन कार्यालय लहान, सिरहालाई पनि गराएको छ ।
