काठमाडौँ । नेपाली कांग्रेसभित्रको आन्तरिक द्वन्द अझ चर्कने अवस्था सिर्जना भएको छ ।

महामन्त्रीद्वय गगन थापा र विश्वप्रकाश शर्माको अगुवाईमा भइरहेको विषेश महाधिवेशनले कांग्रेसको वर्तमान कार्य समिति घिटन गरी नयाँ नेतृत्व चयन गर्ने कार्यविधि पास गरेपछि कार्यवाहक सभापति पूर्णबहादुर खड्काले अपिल जारी गर्दै नीति परिवर्तन पनि अस्वीकार गरिएको सन्देश दिएका हुन् ।

‘प्रतिनिधिसभाको निर्वाचन सम्पन्न गरेपछि आगामी २०८३ बैशाखमा हुने १५ औं महाधिवेशनबाट नेपाली कांग्रेसको नीतिमा आवश्यक परिमार्जन र नेतृत्व सहज रूपले परिवर्तन गर्न सकिने अवस्था सुनिश्चित छँदैछ । तसर्थ, अहिले प्रतिनिधि सभा निर्वाचनमा सम्पूर्ण पार्टी पंक्ति एकताबद्ध भई अभियानको रूपमा लाग्न आवश्यक छ,’ कार्यवाहक सभापति खड्काले जारी गरेको अपिलमा उल्लेख गरिएको छ ।

कांग्रेसभित्रको अहिलेको विवाद मिलाउन लागिपरेका मध्यमार्गी नेताहरुले अहिलेको विशेष महाधिवेशनले नीतिगत निर्णय गर्ने, सो निर्णयलाई संस्थापन पक्षले स्वीकार गर्ने र विशेष महाधिवेशन पक्षधर पनि बैशाख २८ देखि ३१ को लागि तोकिएको नियमित महाधिवेशनबाट मात्रै नेतृत्व परिवर्तनमा तयार हुने गरी विवाद मिलाउन लागेका थिए ।

तर, आज विशेष महाधिवेशनमा पेश भएको कार्यविधिमा १४औं महाधिवेशनबाट निर्वाचित पार्टी सभापति शेरबहादुर देउवासहित सम्पूर्ण पादधिकारी, केन्द्रीय सदस्य तथा अन्य संरचना विघटन गर्ने प्रस्ताव हलबाट पारित भएको छ । यस्तै, कार्यवाहक सभापति खड्काले पनि नीति परिवर्तन पनि आफूहरुलाई स्वीकार्य नभएको अर्थ लाग्ने गरी अपिल जारी गरेका छन् ।

यस्तो छ खड्काले जारी गरेको अपिल
हार्दिक अपिल
आदरणीय साथीहरू, 
जय नेपाल !
अहिले मुलुक गम्भीर अवस्थामा छ । देशको सर्वोच्च जननिर्वाचित संस्था प्रतिनिधि सभा बिघटन भएको छ । अन्योल र अनिश्चितताको वर्तमान अवस्थामा देश र लोकतन्त्रका बारेमा सर्वत्र चासो र चिन्ता व्याप्त छ । आगामी फाल्गुन २१ गते प्रतिनिधि सभाको निर्वाचन तोकिएको छ । उक्त निर्वाचन मार्फत संविधानलाई लिकमा ल्याई लोकतान्त्रिक संवैधानिक  व्यवस्था सुचारू गर्न आवश्यक छ । यस अवस्थामा नेपाली कांग्रेस एकताबद्ध, संगठित र सुदृढ हुन अपरिहार्य छ, तर नेपाली कांग्रेसमा अहिले असहज र अन्योलको स्थिति उत्पन्न भएको छ । नेपाली कांग्रेसले देशमा बिषम परिस्थिति उत्पन्न भएको बेला ईतिहासको विभिन्न कालखण्डमा परिस्थितिको सहि मूल्यांकन गरी आफ्नो नेतृत्वमा उचित निकास दिएको हाम्रो ईतिहास छ ।
नेपाली कांग्रेस राष्ट्रियता र लोकतन्त्रको धरोहरका रूपमा स्थापित भएको हुँदा हाम्रो काँधमा फेरी एकपटक ऐतिहासिक जिम्मेवारी आएको छ । प्रतिनिधि सभाको निर्वाचन सम्पन्न गरे पछि आगामी २०८३ बैशाखमा हुने १५ औं महाधिवेशनबाट नेपाली कांग्रेसको नीतिमा आवश्यक परिमार्जन र नेतृत्व सहज रूपले परिवर्तन गर्न सकिने अवस्था सुनिश्चित छँदैछ । तसर्थ, अहिले प्रतिनिधि सभा निर्वाचनमा सम्पूर्ण पार्टी पंक्ति एकताबद्ध भई अभियानको रूपमा लाग्न आवश्यक छ ।
नेपाली कांग्रेसका सबै सदस्यहरू, केन्द्रीय कार्यसमितिका पदाधिकारीहरू, एवं सम्पूर्ण केन्द्रीय सदस्यहरू, महासमिति सदस्यहरू, महाधिवेशन प्रतिनिधिहरू,  प्रदेश, जिल्ला, क्षेत्र, पालिका, वडा तहका पदाधिकारीहरू तथा सदस्यहरू, भ्रातृ एवं शुभेच्छुक संस्थाहरू तथा सहयोगी सबै साथीहरू मिली देशको बिषम परिस्थितिका प्रति गम्भीर हुँदै पार्टी भित्र उत्पन्न असहज अवस्थालाई समाप्त पार्न जरूरी छ । यस अवस्थामा पार्टी एकतामा प्रतिकूल असर पर्ने कुनै पनि गतिबिधि नगर्न सम्बन्धित सबैमा हार्दिक अपिल गर्दै पार्टीमा सम्पूर्ण एकताका साथ अगाडि बढ्न हार्दिक अनुरोध गर्दछु ।
जय नेपाल !
 तपाईहरुको, 
 पूर्णबहादुर खड्का, कार्यवाहक सभापति