दैलेख–१ को वडागत हिसावः १० वर्षपछि कांग्रेसले उठाएको उम्मेदवार वासनाको सम्भावना कस्तो छ ?

वडापालिका बिहीबार, माघ २२, २०८२

दैलेख–१ को वडागत हिसावः १० वर्षपछि कांग्रेसले उठाएको उम्मेदवार वासनाको सम्भावना कस्तो छ ?

काठमाडौँ । आगामी फागुन २१ हुने प्रतिनिधिसभा निर्वाचनमा लामो समय पछि नेपाली कांग्रेसले दैलेख–१ मा उम्मेदवार बनाएको छ । यसअघिका निर्वाचनहरु २०७४ र २०७९ मा सो निर्वाचन क्षेत्रबाट नेपाली कांग्रेसले उम्मेदवार बनाएको थिएन ।

२०७९ सालको निर्वाचनमा सो क्षेत्रमा नेपाली कांग्रेसले नेकपा एसका उम्मेदवारलाई छोडेको थियो । नेपाली कांग्रेस, माओवादी केन्द्र र नेकपा एकीकृत समाजवादीको तर्फबाट उम्मेदवार बनेका अम्बर बहादुर थापा विजयी भएका थिए । थापाका निकटमत प्रतिद्वन्दी नेकपा एमालेका उम्मेदवार रविन्द्रराज शर्मा थिए ।

सो निर्वाचनमा नेकपा एसका उम्मेदवार अम्बर बहादुर थापा १८ हजार २९७ मत पाएर विजयी भए । एमाले उम्मेदवार रविन्द्रराज शर्मा १७ हजार ४४५ मत पाएर दोस्रो भए भने राप्रपा उम्मेदवार कुन्तीकुमारी शाहीले ४ हजार ६१२ मत पाइन् ।

यसपालि नेपाली कांग्रेसले दैलेख–१ मा बासना थापालाई उम्मेदवार बनाएको छ । थापा सो क्षेत्रमा नयाँ अनुहार हुन् । स्थानीय पर्यटन व्यवसायी रुपक थापाकी श्रीमती बासनाले स्नतकोत्तर तहसम्मको अध्ययन गरेकी छन् । नेपाल विद्यार्थी संघबाट राजनीतिक यात्रा सुरु गरेकी थापा महिला अधिकार तथा सशक्तिकरणमा महत्वपूर्ण योगदान पुर्याइरहेकी थापा यसअघि विशेष गरेर राजनीतिका साथसाथै समाज सेवामा सक्रिय थिइन् । कोभिड महामारीको समयमा उनले गरेको समाजसेवा अनुकरणीय थियो ।

सो क्षेत्रमा नेकपा एमालेले रविन्द्रराज शर्मालाई उम्मेदवार बनाएको छ । शर्मा २०७४ को निर्वाचनमा सोही क्षेत्रबाट एमालेबाटै विजयी भएका थिए । २०७९ को निर्वाचनमा पनि उम्मेदवार बनेका शर्मा सो निर्वाचनमा पराजित भए । शर्माले एसएलसीसम्मको अध्ययन गरेका छन् ।

नेपाली कम्युनिष्ट पार्टीले सो क्षेत्रबाट अम्मर बहादुर थापालाई उम्मेदवार बनाएको छ । उनी २०७९ को निर्वाचनमा नेपाली कांग्रेससहितको समर्थनमा उम्मेदवार बनी विजयी भएका थिए । त्यसपछि थापा प्रतिनिधिसभा अन्तरगतको शिक्षा समितिका सभापति पनि भए । तर, समिति सभापतिको रुपमा थापाको प्रस्तुती कमजोर रहेको थियो । थापाले एसएलसीसम्मको पनि अध्ययन पूरा गरेका छैनन् ।

अहिले देशव्यापी माहोल सिर्जना गरिरहेको राष्ट्रिय स्वतन्त्र पार्टीको सो क्षेत्रमा कम प्रभाव रहेको स्थानीय बताउँछन् । यद्यपि, २०७९ को प्रतिनिधिसभा निर्वाचनमा सो क्षेत्रबाट राष्ट्रिय स्वतन्त्र पार्टीले ८८७ मत पाएको थियो । अहिले सो क्षेत्रमा रास्वपाले नन्दकिशोर बस्नेतलाई उम्मेदवार बनाएको छ । बस्नेतले आइएडसम्मको अध्ययन पूरा गरेका छन् ।

यही परिवेशमा वडापालिकाले लामो समयपछि कांग्रेसले उम्मेदवार बनाएको दैलेख–१ मा कांग्रेस उम्मेदवारको अवस्था के हुन सक्ला भनेर यसअघिको निर्वाचनमा समानुपातिकमा पार्टीले पाएको मत तथा गत स्थानीय तह निर्वाचनमा दलहरुले वडागत रुपमा पाएको मतका आधारमा विश्लेषण गरेका छौं । राष्ट्रिय स्वतन्त्र पार्टीको माहौल सो निर्वाचन क्षेत्रसम्म नपुगेको भन्ने स्थानीयको विश्लेषण, समानुपातिकमा बढी मत देखिएको नेकपा एमालेको देशव्यापी रुपमा अवस्था कमजोर भएको, नेकपाले यसपघि निर्वाचित सांसदलाई निकट दिएपनि उनको प्रस्तुती कमजोर भएका कारण जिल्लामा आलोचना भएको र नेपाली कांग्रेसले लामो समयपछि उच्चशिक्षासम्मको अध्ययन गरेको, सक्षम र युवा महिला उम्मेदवार बनाएको कारण उनको पक्षमा माहोल हुन सक्ने स्थानीयहरु बताउँछन् ।

दैलेख–१ मा गुराँस गाउँपालिका, डंगेश्वर गाउँपालिका, भगवतीमाई गाउँपालिका र नारायण नगरपालिका पर्छ । यी स्थानीय तहहरुका वडाहरुमा कुन पार्टीका उम्मेदवारले कति मत पाएका थिए, गत प्रतिनिधिसभा निर्वाचनमा प्रत्यक्ष र समानुपातिकमा कुन दलले कति मत पाएका थिए भन्ने तथ्यांकका आधारमा यो विश्लेषण तयार पारिएको छ ।

समानुपातिक २०७९