काठमाडौँ। गृहमन्त्री ओमप्रकाश अर्यालले शान्ति सुरक्षा, निर्वाचन र समसामयिक विषयमा नेपाल नगरपालिका संघ, गाउँपालिका राष्ट्रिय महासंघ नेपाल र जिल्ला समन्वय समिति महासंघ, नेपालका पदाधिकारीहरुसँग छलफल गरेका छन् ।

छलफलमा गृह मन्त्री अर्यालले आसन्न प्रतिनिधिसभा निर्वाचनलाई स्वच्छ, निष्पक्ष र भयरहीत वातावरणमा सम्पन्न गर्न शान्ति सुव्यवस्था लगायतका पक्षमा मन्त्रालयको तर्फबाट कुनै कमी नरहने बताए ।

उनले निर्वाचनमा स्थानीय तहका छाता संगठनको समन्वयात्मक भूमिकाको प्रशंसा पनि गरे । मन्त्री अर्यालले स्थानीय जनप्रतिनिधि स्थानीय तहको अभिभावक भएको बताउँदै स्थानीय तहका पदाधिकारीसँगको समन्वयलाई महत्व दिएर मन्त्रालय अघि बढिरहेको बताए । 

स्थानीय तहका छाता संगठनका प्रमुख तथा पदाधिकारीहरुले स्वच्छ, निष्पक्ष र भयरहीत वातावरणमा निर्वाचन सम्पन्न गर्न आ–आफ्नो स्थानबाट समन्वयात्मक भूमिका निर्वाह गरिरहेको बताए ।

गृहले १५ माघमा वडातहमा रहेका राजनीतिक व्यक्ति, पदाधिकारी एवं प्रबुद्ध व्यक्तिहरुलाई निर्वाचन व्यवस्थापन लगायतका कार्यमा समावेश गराई निर्वाचनमा निजहरुको अपनत्व अभिवृद्धि गरी गराई स्वतन्त्र, निष्पक्ष एवं भयरहित वातावरणमा निर्वाचन सम्पन्न गर्ने अभिप्रायले ‘सुव्यवस्थित निर्वाचन व्यवस्थापनका लागि वडा तहसम्म समन्वय र सहकार्य अभिवृद्धि गर्ने सम्बन्धी अवधारणा, २०८२ तयार गरी सोही बमोजिम गर्न सबै जिल्ला प्रशासन कार्यालयहरुलाई पत्राचार गरेको थियो।

छलफलमा गृह सचिव राजकुमार श्रेष्ठ, मुख्य अनुसन्धान निर्देशक टेकेन्द्र कार्की, नेपाल नगरपालिका संघका अध्यक्ष भीमप्रसाद ढुङ्गाना, गाउँपालिका राष्ट्रिय महासंघ नेपालका अध्यक्ष लक्ष्मी देवी पाण्डे, जिल्ला समन्वय समिति महासंघका कार्यकारी निर्देशक भरत कुमार भट्टराई, गृह मन्त्रालयको सुरक्षा तथा समन्वय महाशाखा प्रमुख आनन्द काफ्ले लगायत गृह मन्त्रालयका कर्मचारीहरुको उपस्थिति रहेको थियो।