ओखलढुंगाको वडागत हिसावः कहिल्यै चुनाव नलडेका कुमारले बचाउँलान् कांग्रेसको किल्ला ?

वडापालिका शनिबार, माघ २४, २०८२

ओखलढुंगाको वडागत हिसावः कहिल्यै चुनाव नलडेका कुमारले बचाउँलान् कांग्रेसको किल्ला ?

काठमाडौँ । फागुन २१ को लागि तोकिएको प्रतिनिधिसभाको निर्वाचन आउन अब १ महिना पनि समय बाँकी छैन । राजनीतिक दल, उम्मेदवार र कार्यकर्ताहरु भोट माग्न मतदाताको घरदैलोमा पुगिसकेका छन् ।

एउटा मात्रै निर्वाचन क्षेत्र रहेको ओखलढुंगामा नेपाली कांग्रेसले कुमार लुइटेललाई उम्मेदवार बनाएको छ । लुइटेलसँग यसअघि कुनै पनि तहमा निर्वाचन लडेको अनुभव छैन । राजनीतिसँगै व्यवसायमा पनि संलग्न लुइटेल विशेष महाधिवेशनबाट सभापति बनेका गगन थापा निकट व्यक्ति हुन् ।

यस्तै, सो क्षेत्रमा नेकपा एमालेले अस्मिता थापालाई उ्रम्मेदवार बनाएको छ । उनी ओखलढुंगाकै लिखु गाउँपालिकाको निर्वतमान उपाध्यक्ष हुन् । उनी एमाले अध्यक्ष केपी शर्मा ओली निकट युवा नेता पनि हुन् । गत महाधिवेशनमा थापा ओखलढुंगाबाटै प्रतिनिधिमा पराजित भएपनि अध्यक्ष ओलीको जोडबलमा प्रतिनिधि बनेर मात्रै आइनन्, केन्द्रीय सदस्य नै निर्वाचित भइन् । यद्यपि, जिल्लामा भने उनी एमालेको सिनियर नेता होइनन् । उनलाई एमालेले उम्मेदबार बनाएपछि एमाले जिल्ला कमिटी नै नेपाली कम्युनिष्ट पार्टी नेकपामा प्रवेश गरेको छ । नेकपाबाट अम्मिरबाबु गुरुङ उम्मेदवार बनेका छन् । एमाले नेता गुरुङ कोशी प्रदेश सांसदबाट राजीनामा गरेर प्रतिनिधिसभा निर्वाचनमा होमिएका हुन् । गुरुङलाई पूर्वमाओवादी केन्द्र, नेकपा एकीकृत समाजवादीसहितका दल समाहित भएर बनेको नेकपाले उम्मेदवार बनाएको छ । उनी चर्चित व्यवसायी पनि हुन् ।

यस्तै, राष्ट्रिय स्वतन्त्र पार्टी (रास्वपा) ले सो क्षेत्रबाट विश्वराज पोखरेललाई उम्मेदवार बनाएको छ । पोखरेल अवकाश प्राप्त प्रहरी अधिकृत हुन् । एमाले वरिष्ठ नेता ईश्वर पोखरेलका भाइ नाता पर्ने विश्वराजको स्थायी ठेगाना पनि ओखलढुंगा होइन । यद्यपि, पछिल्लो समय देशव्यापी रुपमा रास्वपाको पक्षमा माहोल छ ।

ओखलढुंगा जिल्ला नेपाली कांग्रेसको किल्लाको रुपमा परिचित छ । २०४८, २०५१ र २०५६ को प्रतिनिधिसभा निर्वाचनमा दुबै क्षेत्र नेपाली कांग्रेसले जितेको थियो । २०६४ सालको पहिलो संविधानसभाको निर्वाचनमा दुबै क्षेत्र माओवादीले जितेको थियो भने २०७० को दोस्रो संविधानसभा निर्वाचनमा एउटा क्षेत्र एमाले र अर्काे कांग्रेसले जितेको थियो । २०७४ सालमा एउटा मात्रै क्षेत्र बनाइएको सो जिल्लामा एमाले जितेको थियो भने २०७९ को प्रतिनिधिसभा निर्वाचनमा नेपाली कांग्रेसले जितेको थियो ।

यसैक्रममा वडापालिकाले कोशी प्रदेशमा पर्ने ओखलढुंगा जिल्लाको चुनावी परिणामबारे विश्लेषण तयार पारेको छ । यो विश्लेषण हामीले जिल्लाका प्रमुख राजनीतिक दलहरु नेपाली कांग्रेस, एमाले, नेकपा (तत्कालिन माओवादी र नेकपा एस) ले पाएको २०७९ को प्रतिनिधिसभा निर्वाचनको प्रत्यक्ष तथा समानुपातिक र सोही वर्ष भएको स्थानीय तह निर्वाचनको पालिका र वडास्तरमा दलहरुले पाएको मतका आधारमा तयार पारिएको छ ।

समानुपातिक निर्वाचन २०७९