काठमाडौँ । एनआईसी एशिया बैंकले आफ्नो संस्थागत सामाजिक उत्तरदायित्व अन्तर्गत देउपुर, पर्वतस्थित देउपुर स्वास्थ्य चौकीलाई स्वास्थ्य उपकरण तथा अन्य सामग्रीहरु सहयोग उपलब्ध गराएको छ ।
स्थानीयस्तरका बिरामी तथा सेवाग्राहीहरुलाई स्वास्थ्य सेवा उपलब्ध गराइरहेको उक्त स्वास्थ्य चौकीको सेवा अझ प्रभावकारी तथा सहज होस् भन्ने हेतुले बैंकले स्वास्थ्य चौकीलाई ह्वीलचियर, डस्बिन, फुट स्टेप, कुर्ची, स्युचर सेटलगायतका सामग्रीहरु उपलब्ध गराएको बैंकको सहायक प्रमुख कार्यकारी अधिकृत जयन्द्र रावलले जानकारी दिए ।
दैनिकरुपमा स्थानीय सेवाग्राहीलाई स्वास्थ्य सेवा उपलब्ध गराइरहेको यस स्वास्थ्य चौकीको लागि बैंकका चिफ मार्केटिङ्ग अफिसर दिपेन्द्र शर्मा र पोखरा सर्कल हेड स्वेता शेरचनले मोदी गाउँपालिका वडा नम्बर २ का अध्यक्ष तथा उक्त स्वास्थ्य चौकी व्यवस्थापन समितिका अध्यक्ष बेलबहादुर कार्की क्षेत्री र उक्त स्वास्थ्य चौकी प्रमुख रुपेश कुमार कुशवाहालाई संयुक्त रुपमा उक्त उपकरण तथा सामग्रीहरु हस्तान्तरण गरेका हुन् ।
कार्यक्रममा स्वास्थ्य चौकीका कर्मचारीहरु, बैंकका कर्मचारीहरु तथा स्थानीयहरुको उपस्थिति थियो ।
बैंकले उपलब्ध गराएको उक्त सहयोगले उक्त स्वास्थ्य चौकीले उपलब्ध गराइरहेको स्वास्थ्य सेवा अझ प्रभावकारी भई स्थानीयस्तरमा स्वास्थ्य उपचार तथा सेवा लिइरहेका सेवाग्राहीलाई स्वास्थ्य सेवामा अझ सहज हुने विश्वास बैंकको छ ।
