Odapalika - The Fourth Estate - चौथो अंग
३६ करोड खर्च गरेर पुनःनिर्माण गरेपछि यस्तो देखिने छ भद्रकाली मन्दिर

काठमाडौँ । काठमाडौँ महानगरपालिकाले करिब ३६ करोड रुपैयाँ खर्च गरेर भद्रकाली मन्दिर क्षेत्रको पुनःनिर्माण गर्ने भएको छ । 

काठमाडौं महानगरपालिकाका उपप्रमुख सुनिता डंगोलको अध्यक्षतामा लुमधि भद्रकाली मन्दिर परिसरका संरचनाहरुको पुनःनिर्माणका सम्बन्धमा गत मंगलबार बैठक बसेको थियो । बैठकले पुनःनिर्माण हुने ठाउँहरु गुठी संस्थान र लुमधी भद्रकाली व्यवस्थापन समितिले खाली गराउने निर्णय गरेको छ ।

बैठकले सम्पदा तथा पर्यटन समितिका संयोजक आशामान संगतको संयोजकत्वमा सहजीकरण समिति गठन गरेको छ ।

समितिको सदस्यहरुमा वडा नम्बर ११ का अध्यक्ष हीरालाल तण्डुकार, वडा २२ का अध्यक्ष चिनीकाजी महर्जन, सहरी योजना आयोगका सदस्य बाबुराम भट्टराई, लुमधी भद्रकाली मन्दिर व्यवस्थापन समितिका अध्यक्ष गणेशबहादुर महर्जन, समितिका पूर्व अध्यक्ष गौतम डंगोल, पुरातत्व विभाग र गुठी संस्थानका प्रतिनिधिहरु छन् । समितिको सदस्य सचिवमा सम्पदा तथा पर्यटन विभागका प्रमुख कुमारी राई छन् ।

सहजीकरण समितिले मन्दिर परिसरका संरचना पुनरुत्थान गर्ने क्रममा अभिलेखन, निर्माण सामग्रीको व्यवस्थापनसहित पुनर्निर्माणको काममा सहजीकरण गर्नेछ ।  

बैठकले मन्दिर क्षेत्रमा भएका संरचना, शिल्प र शैलीको अभिलेखन (अवस्था तथा तथ्यको विवरण) तयार पार्न पुरातत्व विभागलाई अनुरोध गर्ने, अहिलेको संरचना भत्काएपछि संकलन हुने निर्माणजन्य सामग्रीलाई पुरातत्व विभाग, गुठी संस्थान, लुमधी भद्रकालीे व्यवस्थापन समितिसहितको सहजीकरण समितिले समन्वय र व्यवस्थापन गर्ने निर्णय गरेको छ । 

वैठकमा काठमाडौँ महानगरका प्रमुख प्रशासकीय अधिकृत प्रदीप परियार, सम्पदा तथा पर्यटन विभाग, सार्वजनिक निर्माण विभाग, सहरी व्यवस्थापन विभाग, पुरातत्व विभाग, वडाध्यक्षहरु, मन्दिर व्यवस्थापन समितिका प्रतिनिधि सहभागी थिए । 

मन्दिरको पश्चिम, उत्तर र दक्षिणतिर पाटी सत्तललगायत भवन संरचना छन् । यसको पुनर्निर्माणको लागत अनुमान करिब ३६ करोड रुपैयाँ छ । 

पुनर्निर्माणका लागि बोलपत्रबाट निर्माण पक्ष छनोट गरेर सम्झौता भइसकेको छ । वरिष्ठ इञ्जिनियर रवीन्द्र रिजालका अनुसार निर्माण पक्षसँग ३४ करोड ८० लाख ७१ हजार रुपैयाँमा सम्झौता रकम तय भइसकेको छ । यसको निर्माण अवधि तीन वर्ष हुनेछ ।

यसै विषयमा वडापालिकाले काठमाडौँ महानगरसँग सम्पर्क गरी पुनःनिर्माणपछि भद्रकाली मन्दिर कस्तो हुनेछ भन्ने जिज्ञासा राखेको थियो । महानगरले दिएको जानकारी अनुसार पुनःनिर्माणपछि भद्रकाली मन्दिर यस्तो हुनेछ ।

bhadrakali-mandir2-1718366382.jpg
bhadrakali-mandir-1718366380.jpg
bhadrakali-mandir1-1718366379.jpg

प्रकाशित मिति: शुक्रबार, जेठ ३२, २०८१  १७:४६
प्रतिक्रिया दिनुहोस्
Weather Update