काठमाडौँ । काठमाडौँ महानगरका मेयर बालेन्द्र शाह (बालेन) ले पदबाट राजीनामा दिएका छन् ।
मेयर बालेनले आज (माघ ४ गते) देखि लागू हुने गरी पदबाट राजीनमा गरेका हुन् । उनले उपमेयर सुनिता डंगोललाई राजीनामा बुझाएका छन् ।
मेयर बालेनले स्वेच्छाले राजीनामा दिएको उल्लेख गरेका छन् । उनी फागुन २१ मा हुने भनिएको प्रतिनिधिसभा निर्वाचनमा उम्मेदवार बन्दै छन् ।
२०७९ सालमा स्थानीय तह निर्वाचनमा स्वतन्त्र उम्मेदवार बनी विजयी भएका बालेन अब राष्ट्रिय स्वतन्त्र पार्टी (रास्वपा) बाट प्रधानमन्त्रीको उम्मेदवार बनेका छन् । रास्वपाले उनलाई वरिष्ठ नेता बनाएको छ । बालेन प्रतिनिधिसभा निर्वाचनमा झापा–५ बाट चुनावी प्रतिस्पर्धामा उत्रने बताइएको छ । सो क्षेत्रबाट एमाले अध्यक्ष तथा पूर्वप्रधानमन्त्री केपी शर्मा ओली निर्वाचित हुँदै आएका थिए भने आगामी निर्वाचनमा पनि एमालेबाट ओली नै उम्मेदवार बन्ने सो पार्टीले जनाएको छ ।
